Naite kha kan khua ka phan. Kum 18 hnu ah. Kan khua cu Sihhmuh asi. Thantlang in meng 20 ahla. Vanmual chuak Buanlung le Sihhmuh hawikomhnak kan tuah. Ka kirlei ah Hakha ah midang cio bang lakphak dinah zingka tein kai thawh. Pu Van Hu le Pu Ṭha Kung ka ton hna. “Utu, na tlung maw? Thaizing hi Timit ah picnic kan tuah lai kan ti i na huam ve maw?” anti. Kei nih, “Huam. Ka duh phunte asi” ka ti.
Pu Van Hu nih hlasak thiam nungak kan sawm hna hnga maw? Sawm awk bel an har lai. Khuate lei ah an kal viar ati. Kei nih, “Nungak theng ahau lo. Kan herhmi cu hla sakpitu le hla sakpiaktu kan herh” ka ti. “Asi ahcun Hlawn Taang kan sawm lai. Angah maw?” ati. Kei nih, “Ngah tuk. Anih cu hlasak athiam bakmi asi pinah hawikom hlun asi i amah cu aṭha tak lai” ka ti. “Asi ahcun thaizing suimilam 10 ah Kaungkyait hmai ah itong usih” anti.
Athaizing (15-4-2015) zingka teah Pu Van Hu sinah lakphak dinpah in ka kal ṭhan i, “Kan picnic ah titan le tlangkai ai tel lai maw? Ai tel ahcun ka ngaihlah deuh” ka ti. “Tel hlah” ati. “Cuti asi ahcun ka ra lai” ka ti. Cun ka khaubawi luchin le camera he hawihlan ah Kaungkyait hmai ka phan. Kan hawipa pakhat nih ahong ka chonh i, “Nang picnic ah na ra lai maw?” tiah ka hal. “Ka rat ahcun an ka that lai lo maw. Kei 60 ka tlin rih ṭung lo” tiah ati. Cuhnu lawngah kan picnic hi kum 60 cung mino ca lawngah pei asi hi ti kai fiang.
Cuka hmun cun Pa Ceu light truck raangte ah ei ding le din ding kan sanh kan sanh i kan ithawh. Kei kha ano cem tiah hmai ah an ka ṭhut ter. Cun Khuathar Falam le Thantlang lampial in ka ihngak. Cun nutung pakhat kha rawlchuangtu ah anti i ka pawngah hmai ah an ṭhutter ve. Cun Timit cu minit 30 ah kan phan.
Timit hlei he ai neih bikmi pahnihnak thlam ah kan luut. Kha kha thlam ka ti nain inn kelte asi. Pu Kep Chin thlam asi. Inn hmailei he inncarlei he inleeng aum. Ṭhutnak aum. Khuacuanhnak aṭha. Achungah ṭhutdan, cabuai, bizu, umkheng le tapi zong aum. “Nai Victor Biak Lian techung an tlun lioah hi thlam hi an phan maw?” tiah Pu Chiah Kio ka hal. “An phan, an phan” ati.
Cun tlengtlang tiah ti athan na, thing akhawm na, mei akau na, ar hmul aphaw na, voksa acan na, kawpi apar na, khachuan akhek na, buh achuang na, lakphak aser na an si. Nang cu rak um ko anti i zei ka bawm hna lo. Pipa pung khat in ti (athiang lomi) rak um kaw kan iphurhmi Myanmar Beer cu thawl khat hnu thawl khat an hei thlak. Din tikah kikdeuh seh tiah. Cu karah ai manh deuhmi Pu Dawt Bik nih Guitar ai laak i Oh the Lady Oh, Oh the Lady Oh tiah hla avon sak. Ahla adih bak ah Fiakfairok avon ti I kan ni phungmang.
Nungak pahnih an ra i motorcycle thli chemnak kan hlan uh anti. Nungak lawngte bu khat an si ve. Kannih kha pa lawngte bu khat kan si. Ifon usih tiah an icapo i Pu Chiah Kio nih, “Nan ei thlu lai. Kal uh” tiah ati hna. Achungkhat an si i lungtheih in atimi asi. Kei nihcun ra ve hna seh ti ka rak duh ziar. Ahmasa ah lakphakti le changreu kan ei. Cake athawmi thlang ngan pipi pahnih an von par. Voiding lakphak le changreu nak in athaw deuh.
Pakhat le pakhat theihternak (introduction) kan tuah manh lo. Kan hawile cu cheuthum cheukhat lawng ka hngalh hna. Anmah lak zong ah aka thei lomi an um len ve. Voikhat ka zun kazun i ka rak kir ṭhan poh ah aka theitu an ichap. Ka umlo kar ah hi tarpa hi aho hen asi an rak ti i aka hngalmi nih an rak chimh ko hna lai hih tiah ka ruah.
Chunhnu suimilam pahnih in rian kan thok. Bia chimta anti i an picnic ah an ka sawm ve caah kai lomhnak ka chim. Cun kan ram ṭhancho ai tiim. Tourists an ra lai. Contract nan hmuh tikah amiak duh tuk hlah uh. Kanmah ram ca asi ko. Tlawmpal amiak nan hmuh ahcun aza ko ka ti. Cun chim duhmi nih an chim cio. Cun thla na cam lai maw anti. Thla maw kan cam lai? Adang nih cam uh ka ti. Pu Chiah Kio nih acam. Athiam ngai.
Cun Cheers! Kan von ti. Kan hrai kan von thlir. Beer (bi-a) aduh nih beer an ding. Mandalay Rum (Export Quality) aduh nih Mandalay Rum (athaw khunmi) kan ding. Acheu nih ti kan icawh. Acheu nih beer le rum an cawh. Ameh ah arsa le ngahringdawi sa. Kan phak hnu ah lopa nu pahnih ngahring kan dawiter hna i pakhat nih cawhnuk bu hnih atlaih. Adang pakhat nih bu nga hrawng atlaik. Ahme tete, aphun ai khatmi a si. Kan kio i athaw taktak. Ameh ca ahcun special asi. Atha nuam seh anti i nangmah an in doihmi asi an hei ti. Tampi in imeh anti. Kan picnic kong hi cabia ṭial te seh ti an duh caah asi cuh. An duh bang ka ṭial ve ko hih.
Cun hla an von ithawh i hla kan sa. Hawikom he vei von din pah i Lai zuun hla sakṭi hi anuam cem ko ka ti. Nightclub kal i hlawhthlorh i ihlawh nakin ka duh deuh. Sopawt laam zong in laam khawh asi. Hla cu fung khat cio tal nan ithawh lai ti asi. Ithawh ti cu nan ithim lai ti khi asi ko. Ithawh taktak cu asi lem lo.
Ahla min zong cu kan hngal lo i hla chung ai telmi biafang pahnihthum hei chim khi asi. Abultan in kan von chim i hlathiam deuh pawl nih an kan hruai. Pu Van Hu nih cowboy hat he guitar avon itlaih i Pi Ṭial Thluai (Ṭha Men Nu) he an kan hruai. Pi Hlawn Taang belte ara kho lo. Yangon in Pi Tum Iangte an tlung I kaltaak awk aṭha lo anti. Pu Van Hu hi LPE (Lai Par En) ah ai telmi hlasak thiam le hlaphuah thiam asi. Pi Ṭial Thluai hi tuandeuh ah rawlchuan piaktu tiah an rak ka chim nain hlasak piaktu le hlasak pitu ah an rak sawmmi asi ai. Zei hla poh ithawh law athiam dih lai an ka ti.
Kan hlasakmi ah kan tlo bik nak cu kanmah Ṭhinṭhang Phu kan tlo biknak asimi Ka Dai Lai Lo timi hla ṭhiamṭhiam asi. Ka Dai Lai Lo Vulei Dongh Tiang kan ti chel, Ka Dai Lai Lo Dai Nai Sai Hlah kan ti chel. Hi hla hi cu zapi thiammi asi i kan sak poh ah nolh lo te cu kan duh lo. Sak pah in zapei beeng na alaam na kan si fawn. Ṭhuangruah Sur Hnu Thaizing Fing le Tlang Khi Zoh Hmanh timi zong kan duh ngai. Ka hawipa Pu Ruak Uk (US) phuahmi asi. Hakha ah taanghra kan cawnṭi lio 1963/64 ah arak sak tawn.
Keimah phuahmi asi hih ti cu arak chim duh lo. Ahnupi lawngah amah phuami asi ka theih. Pu Ṭha Kung pahnih lak ah pakhat (Ṭha Ṭha Ngun pasal) nih hla pakhat ai thim. Abultan in. Asinain hlathiammi nih zei hla asi ti an hngalh. Cun Julian nih Hlanlio Ka Nun Ka Ruah ah timi sa usih ati. Hihi ka Uhrang phuahmi asi rua. Kei nih Kawp Neilo Vaal … Hi Ceu Maw Ka Chuahchan … Ka Vai Lai Ka Hawi
Vaalmi Sinah timi hla sa usih ka ti ve. Hihi Ṭhinṭhang picnic zong ah kan sak tawnmi asi. Cun Dawrhlun nungak dawh Nuai Nuai le Innral nungak dawh Sui Cer uarnak hla an rak phuahmi zong an von sak i kan inuam ngai. “Nuai Nuai cu US aphan cang. Sui Cer cu Dr Hla Aung inchungnu khi asi cuh. Na hngal hna maw?” an ka ti. “Hngal e, ka rak uarmi pei an si cu” tiah kai capo ve i an ni phungmang.
Hla cu an von ithawh cio. Aho nih zei hla ai thawh ticu ka ciing ti lo. Kei nih Kan Chan Ai Liim Riangmang Cang Lai timi hla sa usih ka ti i “Ai liim naisai lo cu a” anti. Sak thiami kan tlawm i kan tlo kho lo. Atlo deuhmi hla sa usih kan ti i zapi thiammi hla kan sa. KENRET lio i khuachung Biak Ceu sakmi Kan Co Kho Bal Rua Lai Lo timi hla le Ṭhal Caan Ti Ngahring kan dawinak ti tehna, Bil Sung sakmi Ti le Nga Bang timi hla te hna kan sak i kan tlo deuh. Kan zapei kan bengh. Alammi an laam. Kan inuam bak. Pianciazi lo cun tlamtling hlah kaw Pu Thang Cem nih hman akan thlak. Durkeu pi in tihang ka din lio hna aka thlak.
Timit hleichak (ahnalei) ah Hakha khua ti peeknak ah ti dil an timh. Afuhnak lam an cawhmi zong alang. Tidil (dam) adih tikah ti aliam kho lai lo i athlanglei Tita tiang ti areu lai ti kan phaang tiah U Van Hu nih aka chimh. Ti areu ahcun ngahring dawi khawh zong asi ti lai lo ati. Kampani nih ṭha tein an co lo sual lai ti zong kan phaang ati.
Kan ṭiin cang lai kan ti i group photo kan ithla. Amui deeng cang caah asi rua kan hmantlak aṭhalo. Hlasak kan vuai lo i Khuathar ah Pu Bawi Bik inn sak liomi ah kan taang i kan inuam ṭhan. Ahlei in akan dangh rih. Cuka ahcun Mirang laam in micheu an laam. Rani pa cu laam athiam ngai. Atlanval lioah nungak he an rak laam tawn ṭheu lai. Kan hnulei kum 40 hrawng ahcun kan rak laam bal ve nain kei cu ka thiam ti lo.
Picnic ai telmi ah Van Hu, Chiah Kio, Ṭha Kung A, Ṭha Kung B, Dawt Bik, Lian Thang, Chan Zam, Biak Hu, Hram Hmun, Pa Ceu, Thang Cem, Bawi Bik,Rani pa(Christ Day), Julian, Ṭial Thluai le keimah kan si. Kan dihlak 16 kan si.
Acunglei i ka chim cangmi Pu Ṭha Kung bia in ka cabia ka donghter lai.”Hmailei cu mahnak ṭhadeuh in kan tuah lai. Vok kan thah lai. Ahnu tuahmi cu ahmasa tuahmi nakin aṭhat deuh lengmang awk asi” ati. Kan tuah ṭhan tikah tel aduhmi kum 60 cung mino vialte sawm cia nan si. Acunglei minung 16 chungah pakhat khat sinah min peek chung khawh asi. (22/4/2015)