CACC Laiholh Ruatkhangtu Committee chungtel ka si caah meeting an ka auh chel ahcun ka kai tawn. CACC Triennial Delegate Meeting belte atu Avoi 10nak lawngah ka kai. Hihi cu mah le Khrihfabu nih meeting kaituding kuzale (delegate) thlahmi lawng nih kai khawh asi. CACC ah thawhvo tamdeuh pee nih kuzale tamdeuh thlah khawh asi. Tukum ah LBC in kuzale 6 kan si. Rev Dr Sui Ṭial, Pu Ṭial Ling, Pastor Peng Thang, Rev Dr Thomas Cung Bik, Pu Sui Mawng le keimah kan si. Hmun khat ah kan kal lo. Kan dang care cio in kan kal.
Bawm Delegates
Bangladesh ram in kanmah Laimi asi vemi Bawm ai timi kuzale pali an ra ve. Cu hna lakah ka Facebook friend Lal Duh Sang Bawm ai tel ngelcel. An rat pah in kan ichawn lengmang. Ahnu ah hmunkhat kal ding kan si ai. LBC min in Pu Joel Ling nih adon hna i hotel ah achiah hna. Cun Hakha Maan ah athlah hna. Kha hnu khan kei nih ka kutrit hna. CACC hal than teding in rawlman ka liam piak hna. Cabuai pakhat ah adang tein ka thutter hna i an pawng cabuai dangah kei ka thu. “Hi hna pali caah voucher tial law kei cu adang tein kan peek hna lai” tiah rawldawr cu ka ti tawn hna. Bus cungah kan thutnak belte ai dang i bia tampi kan iruah kho lo. Laiholh cio kan hmang nain kan itheih khawh lo caan aum. An thei lo sual lai ka ti caan ahcun Mirangholh hna kaa khat hnih telh ahau. Anmah lakah kum upa cem Sawn Thuang Hlawnceu he belte ṭha tein kan ichawn kho.
Nabual Khua
Avoi 10nak CACC Triennial Delegate Meeting cu Nabual Khrihfabu kum 100 tlinnak he an kemh caah meeting hmun cu Nabual khua asi. Nabual cu Hakha in motor in minit 30 kal lawng asi i alaang kal na, ariak kal na kan si. Khual riahnak ah Centenary Hall tiah inn dot hnih an rak sak. Cuka ah mitam deuh cu kan riak. Puan ṭhaṭha le puan lumlum an kan peek. Lai facang huutmi le sa aphunphun an kan dangh. Rawl mahte laak (buffet–bufe tiin rel) asi i rawl atlawttlau lo. Cucu thil tha asi. An kan zohkhenh ning aṭha tuk. US in Pu Thlasui Tluangneh nih atawlrelpi hna.
Rev Hrang Awi nih an khua aka chawhpi. Hakha tha tein alang. Hlan ahcun apin deuh ah an rak um. Ahnu ah Hakha khua in alanghnak ah an iṭhial. Certual ṭhate an nei. William Khen Chum Bik te inn le Thlasui Tluangneh te inn le hlasak thiam Leng Tawk Men te inn hna aka hmuhsak. Inn 40 fai lawng asi i kan khua Sihhmuh zat hrawng an si. Lopil pali lawng an nei i dum tuah in an ṭang. Fu le banhla le sangphaw tampi an ciin. Hakha ah an zuar. Tangka an hmu ngai. An khua hi naa an ibualh tawnnak asi caah Nabual tiah min an sak. An khua arawn i hmun ṭha ngai asi. Hakha nakin alum deuh i Nabual khua um i Hakha zung kai khawh ding asi. Thingai tampi ka hmuh. Acheu cu kum 10 nak tamdeuh hlunh dawh an si. Cucu tangka khon phunkhat ah ka chiah.
Meeting Kaimi Le Khawm Zawhmi
Avoi 10nak CACC Delegate Meeting kai ding kuzale le khawm zawhmi hi khua tampi le ram tampi in an ra i international meeting ti khawh asi. India, Bangladesh, US, Australia, Norway le ram dangdang in an ra. Paletwa peng ummi Bawm zong hlaremh bu he an ra. Mizoram Lawngtlai khua hlaremh bu cu an thiam taktak. Cazoh lo bak in hla an sa. Hlasak thiam Leeng Ruthi F. VI Ringheti le Leeng Vanlalzawmpuii zongan ra. An aw aṭha taktak. Kanmah lei in hlasak thiam kan neihmi Vaal Tluang Za Lian, Leng Tawk Men, Esther Dawt Chin Sung le Vaal Ṭha Kung Thang zong an ra kho le an hlasak zong tampi kan theih.
Phungchimtu zong an thiam cio. Biatawi chimtu zong an thiam. An min ka chim cawk lai lo. Bangladesh in Lal Duh Sang Bawm chimmi cu lunghno ngai asi. An ram ah thleidan an ton ning le kanmah lei an kan bochan ning achim. Kannih lei nih kan chanh kho ṭung hna lo. Zaangfaak ngai an si.
Triennial Delegate Meeting
Kan rathnawh chan Triennial Delegate Meeting ahhin zei caihhmai asi lem lo. Report an von tial ciomi fehter cem asi ko. Kan meeting cu Hluttaw meeting phun in an kan kalpi. Meeting chairman Rev Joel Nawl Cung Lian zong meeting uk athiam ngai. Kan meeting akal thluahmah. An rak caihmi fehter duahmah asi tikah rubber stamp parliament timi masala chan lio Hluttaw kan lo pah. Nan hna atla maw tiah voithum au i atla tiah voithum au ve asi ko. An report tialmi kan rem deuh lo le tlawmpal hei chim ve asi. Ahnu ahcun ṭial cia ning in fehter thiamthiam asi.
Midang chimmi cu ka ciing ti lo. Keimah chimmi pakhat cu ka u Rev James Sangawi nih alehmi Biahren Thar cauk kong asi. Cu cauk cu amah min chim loin Biakam Thar tiin CACC nih an chuah. ‘Biahren’ timi biafang te kha ka u nih aduhmi asi. ‘Biahren’ ti zong telh lo James Sangawi min zong telh loin cauk nan chuahmi cu amin hloh nan duh maw asi ka ti hna.
Cu cauk ahramthok ah hitin ai ṭial. “Biahren Thar hi © James Sangawi le a fale ta asi. Ahopaoh nih ṭial awkah i laak khawh le i tlen khawh asinain a cauk ning in chuah ṭhan khawh asi lo”. Hiti ai ṭial ko nain an chuah thiam thiam. Copyright kong hi CACC nih an hngalh lo maw asi an hngalh ko bu in dek an buar. Cun Khrifabu kip nih CACC caah cheuhra cheukhat chung in 2% kan thawh. Khakha ‘2% pehtlaihnak’ tiah an ṭial. Cucu zeicahdah ‘pehtlaihnak’ nan ti. Thawhlawm nan ti ko lo. Ahlu ti zong nan ti ko lo. Communication zong hi pehtlaihnak tiin nan leh. Bu dang he ṭuantinak le ikomhnak bantukin nan chim tawn.
Hika zawn i communication rak timi hi ca le holh asi. Achim duhmi cu caholh asi. Nannih cu caholh tu nan daithlanh i mission hna development hna nan ṭuan. Cucu nan huam deuhmi le nan thiam deuhmi asi rua ka ti.
2% Thawhvo in 1.5% ah
Hi meeting ah fehtermi abiapi ngaimi cu CACC chungtel Khrifabu nih CACC caah an cheuhra cheukhat chung in 2% an thawh tawnmi kha 1.5% ah ṭhumh siseh ti asi. Hihi TABC nih an rak chuahpimi asi anti. Hi ti ṭhumh khawh asi nak cu ramleng Khrifabu tampi CACC member an si cang tikah tangka tampi achuak.
Hmailei ah 1% hna, 0.5% hna si kho selaw atha hnga. An rian taktak asimi cauk, mekazin le VCD tibantuk hna tampi chuah hna selaw bomh hau loin nung kho hna selaw teh athat chinchin hnga. Korea zatlan (drama) hna khi Mizo holh cun an leh tuk cang. Let ve hna selaw mino nih an duh ngai lai. An zung nganpi dot li zong khi dot hnih hrawng mi hlan hna selaw phaisa tampi hmuh khawh asi hnga.
Biafangkomh
Biafangkomh hi kum 30 hrawng an buaipi cang nain an hlawh atling lo. CACC biafangkomh avoi 7nak cauk kha ahnu bik asi i cucu anmah CACC rianṭuantu hmanh nih an zul lo. Mah hi report an ṭialmi ah tampi alang. Tahchunhnak: ‘A voi’ asi chel ‘avoi’ asi chel. ‘Lam Kaltu’ tiin an tial zawn ‘Lamkaltu’ tiin an tial zawn. ‘A hlun’ ti zong kan hmuh ‘ahlun’ ti zong kan hmuh. ‘A tanglei’ tiah biafang pahnih in an tialmi aum. ‘Atanglei’ tiin biafang pakhat in an tialmi aum. ‘Pekmi’ tiah ‘mi’ kha kehlei biafang ah an benh chel. ‘Rem mi’ tiah an ṭhen chel. Akong, azat asi chel. A kong, a zat asi chel. Hitihin biafang pakhat hi an then chel an kawp chel asi. Midang nih CACC tining an zulh lo hmanh ah anmah nihcun an zulh awk asi.
Mirangholh
Report an ṭialmi ah Mirangholh telh aherh caah an telh tawn. Ai palhmi aum len. Typing mistakes zong asi kho palh hrimhrim zong asi kho. Lawngtlai in arami kan hawile pawl le Bangladesh in arami kan khual pawl sinah ningzak ngai kan si. An palhmi: contact staff, brand office, fox & spoon, stationary. Cun atu le atu chim lengmangmi delegate timi awchuah an thiam lo. Noun aw in chuah ding kha verb aw in an chuah. Bangladesh pawl nih an thiam. An kan nihsawh ziar lai. (Mirang biafang ahhin –ate tiin adongh tikah verb asi ahcun ‘eit’ tiin aw chuah ding. Noun asi ahcun ‘et’ tiin aw chuah ding asi. Verb ah ‘i’ aw aum. Noun ah ‘i’ aw aum lo. Cucaah ah delegate (kuzale) hi ‘deleket’ ti phun deuh in aw chuah ding asi. ‘Private’ awchuah khi ruat hmanh. Hmailei thiam awk ah ka telhmi asi).
Comment
Acunglei Biafangkomh le Mirangholh kong ka ṭialmi hi CACC soi duh ah aṭial nan ti men lai. Asilo. CACC hi Khrihfabu tampi nih kan dirhmi asi tikah kan soi siang hna lo. Cun bu pakhat an si tikah bu tuahmi cu kan zulh hna lai ti ruahnak aum. Hihi CACC ai miaknak asi. Asinain caak awk asi komi ahohmanh nih kan caak hna lo ahcun an iremh lai lo. An ṭhangcho lai lo. Democracy ahhin opposition party an um lo ahcun ruling party cu an duh poh in an um. Opposition hmanh ah strong opposition um ah aṭha.
CACC nih an palh ka ti tawnmi cu Laica monosyllabic asi hi an cohlang lo. Cucaah ‘komh’ aherhnak an philh. ‘A’ hi pronoun asilo nain pronoun ah an ruah peng. Cucaah then ding le komh ding abuai. Lai biafang vialte Mirang karamar Eight Parts of Speech chungah khumh dih awk ah an ruah. Khumh awk tha lo tampi aum. ‘A’ zong khumh awk ṭha lomi asi. ‘Particle’ asi i ‘prefix’ ah hman awk ah ai rem. NAK, MI, TU, PI, TE hna hi ‘particle’ an si ve i ‘suffix’ i hman awk ah ai rem. Hi hna hi cu kan hman ko. CACC belte nih MI hi naite ah an ṭhen.
White Elephant
CACC ah caantling rianṭuantu 12 le part-time rianṭuantu pakhat an um. 2018-2019 kum hman ding tangka hi K340 million hrawng asi. Hihi Laimi Khrihfabu kip nih kan thawhmi tangka asi. Kum khat i an hmanmi tangka hi atam ngaingai. Hi vialte tangka hmang in CACC nih zeidah an tuah khawh. Zeipipa an tuah lo pinah an rian taktak asimi caholh lei ṭaiṭanh loin an rian asi lomi mission hna development hna an tuan. Cucaah CACC hi Laimi kan caah White Elephant (sai rang) asi sual maw ti ka ruat. White Elephant timi asullam cu tangka dih ngai in zohkhenh ahau tung i ṭhathnemnak zeipipa akan pee lomi tinak asi. Pakhat pa asifak seh ti duh ahcun sai/vui rang laksawng an peek ti asi. CACC hi zohdawh ah inn i zuatmi sai rang siloin in ramlak in thingtum achuah khotu san atlaimi sai pawl siselaw ka duh. (20/5/2018)