Naite kha Thailand ram Chiangmai khua ka va phan ve. Asinain rian herh asi caah hmun tampi phanhnak caan ka nei lo. Cucaah hmun tlawmte lawng ka phan i thil tlawmte lawng ka theih manh. Cu thil tlawmte chung in ka duhmi tete ka von ṭial.
Signboard ah Mirangholh Aum Lo
Chiangmai hi Mandalay he tahchunh an si tawn. Pahnihnak khuapi veve an si. Ramdang khualtlawng an tam veve fawn. Asinain Mandaly ahcun Kawl signboard nakin Mirang signboard atam deuh. Chiangmai ahcun an mah holh lawngte asi. Khualtlawng pawl an kal duhnak tete lawngah Mirangholh an telh. Ramdang khualtlawng (tourists) tamnak khua i anmah holh an uar tukmi hi cu an palh deuh ka ti.
Mirangholh Number Belte An Hman
Signboard ah Mirangca aum lo nain lam number le mawtawka number ah Mirang number an hman. Kha kha tourist tamnak ahcun thil dik asi. Dawr min le lam min hi an ca he Mirangca he apahnih in ṭial hna selaw aṭha hnga. Kawlram zong ah nai khan mawwtawka number cu Mirang number in an ṭialter ve cang hna.
Taxi Driver Mirangholh an Thiam Lo
Kawlram ahcun taxi driver poh nih Mirangholh an thiam. Anmah rianṭuan nak khim cun an thiam cio. Chiangmai taxi driver pawl cu Mirangholh an thiam lo. An mawṭawka lawng aṭha deuh le asi. Voikhat cu Pu Thla Hei nih ahong ka laak i kan umnak phanh awk ah a telifawn kha driver pa apeek i kei nih ka telifawn kha ka sayapa ka peek ve. Anmah le anmah an ichonh hnu lawng ah ka umnak an hong phankho.
Voksa an Duh Tuk
An rawl chuanmi ka ti lai maw an meh poh ah ka ti lai dek voksa ai tello nak aum lok ti awk in voksa atam. Aleng zohnak in voksa asi le arsa asi le ngasa asi hngalh khawh lo awk in aum tawn tikah voksa hrial aduhmi ramdang mi cu kan lo ko. An ca le kan thiam loh. Mirangholh in ṭial chih le an hmang loh. Ka sayapa kha ziah hiti voksa atam ka ti tikah vok zuat cu afawi le caw zuat cu ahar deuh cu teh ati. Cu lawng cu asi lai lo an duh pah hrimhrim bia asi lai hi teh ka ti.
Tikik An Uar Fawn
Chiangmai hi khua sihnak khua ah chiah khawh asi nain tikik rumro an ding. Ti sawsawh an ding ballo ti ngaingai cu ahman lai lo dah. Kawlram bantukin tilum din aum loh. Kawlram bantuk in lakphak dawr i va ṭhutnak aum loh. Kawlram in arami cu kan chaihma ngai. Ka sayapa nih zei na duhmi abaumi aum maw? ati i tilum din awk ka hmu lo hi teh ka ti i kan zung in datbu ahlan i cu hnu lawng ah tilum ka din khawh. Ka sayapa nih Thai mi cu tikik an duh tuk le beer (bi-a) hmanh ah tikik tlang an paih ati.
Kuak Zu an Tlawm
Minung an fim cang i kuakzu hi Kawlram zongah an tlawm nain Thailand ah an tlawm chinchin rua ka ti. Chiangmai kan zung ah ahohmanh kuak an zu lo. Innchung hrimhrim ah kuak zuk khawh asilo. Kuakzuk ka duh tikah leeng ah ka chuak tawn. Ka tlunnak hmanh ah khan dang te ah ka um nain kuakzuk duh ahcun leeng chuah ahau. Yangon Laimi zong hi kuakzu kan tlawm ngai cang. LBC pumh chuah i kuakzu mi cu keimah lawng ka si cang rua ka ti. Tikor hmawm le khaini hmawm belte atam.
Aleeng Rawl Ei Atam
Rawl mahte chuan le ei loin dawr i a-eimi hi an tam. Ze va kal i mahte i rawl ichuan i mahte i khengbel ṭawl cu caan adih tuk anti. Tangka zong adih deuh chinchin hoi. Cucaah rawl aleeng eimi an tam. Rawldawr zong atam ngai. Sianghngakchia le nungak tlangval amah lawng i aummi ca hrimhrim ahcun ai kaih tuk. Aman zong afaak lo. Bt 35/40 hna in rawl ei khawh asi. Kawl tangka in thong khat le tlawmpal khan asi lai.
Ṭaih Khan Ator
Sianghngakchia le mipaak hlaan awk ṭaihkhan hme tete hi atam tuk. Aman zong afaak lo. Thlakhat Bt 3000/3500 in hlaan khawh asi. Cucu Kawl tangka cun K100,000 le tlawmpal lawng asi. Nungak tlangval nih anmah bing in an ihlan cio ko. Ai ṭhi um ka, fa anei rih lomi ca zongah aṭha.
Maalit An Duh Cio
Maalit (massage) dawr hi akenkip ah aum. Nu thlulo pa thlulo, nungak tlangval tlulo in maalit dawr ah an kal lengmang. Thadit thabaat lawng siloin zingkhaan duh ah an kal cio. Mizapi hi an khuasak aṭhat deuh caah asi. Nu cathiam lomi nih rian ṭuan awk an hmuh. Hihi tawdawr asilo. Maalit hi aphunphun in aum. Ke lawng, lu le hngawng le liang lawng, pum dihlak tibantuk in aphunphun aum. Aman hi atlawm bik ah Bt 150 asi. Kawltangka cun K5000 hrawng asi lai.
Hmancia Thil Phun Atling
Kawlram ahhin hmancia hnipuan le ṭhutdan cabuai dawr lawng atam. Chiangmai ahcun minung hmanmi thilri phuntling dawr aum i asang ning piin an um. Duh ti lomi thil zeipoh va zuar khawh asi. Man fawi deuh in thil ṭhaṭha cawk khawhnak hmun asi. Mi tampi nih an duh. Tourists zong an tam. Mitam hrat cun thilthar zong an zuar ṭhiamṭhiam.
Rua le Thing in Sermi Thil
Rua le mau le ṭhiṭhet in aphunphun sermi thil le thing in saihmi minung le satil phunphun (wood carving) zuarnak hi asang ningpi in aum ve. Khua an ti ko. Khua khat bak ansi kan ti lai cu. Hi thil pawl hi vuleicung khualtlawng pawl nih an duh tuk. An cawk tuk hna. Cucaah hi thil ser le zuar in paw ai cawmmi an tampi. Lairam i tourists an rat tikah zeidah kan zorh ve hna lai. Zei in dah an tangka kan laak khawh lai ti ruah ve ahau.
An Ithenh Hlimh
Innchung innleeng le lam zong an thiang dih. Tho le fikfa ka hmu lo. Khiangthawng loin an it. Kuakbul hlonhnak ka hngal lo. Lamkam tilukuang chung zong athiang dih. Rawl chuangmi nih kuthrolh an hman dih. Ka sayapa nih an icawnpiaknak asau cang i an thianghlim ngai ko ati. Rawldawr zong hi khoika ei poh ah pawfah ding aum lo ati. Ti hi teh pipe in atlami din khawh asi maw ka ti cu belte cu asi deuh loh ati. Malaysia ahcun din khawh asi ko ti asi. Kawlram ahcun dinti thiang antimi hmanh athiang lomi atampi ti asi.
Mah vial hi cabia pakhat ca ahcun azaa ko rua ka ti. Zaat lo hmanh ah adang ṭial awk ka hngal ti hnga lo. (8/3/2015)