Ka tupa Charles Ṭial Cung kum sarih nih beach (rili kam these rawn) phanh ka duh ati lengmang le kan chungte in Ngwesaung ah kan kal. Ka tunu Helen Sung Iang kumthum le acheu nih tilawng he vanlawng he ciit ka duh ati ve. Cucaah tilawng ciit nakding khua kan khaang. Yangon ummi nih zanlei ah nuamhnak sawhsawh in tilawng ciit awk aum. Zanlei 5 PM in 7 PM tiang suimilam pahnih chung iciit khawh asi.
Mirangholh in River Cruise anti. Botataung Pagoda pawngte ah jetty aum le cuka cun tilawng tampi ciit ding an um tiah kan theih.
Botataung le kan umnak East Gyogon cu ai hlat tuk tikah tilawng ciit khawh hnu rak kir nakin khuachung ah hotel pakhat ah riak usilaw Yangon khuachung zong kan ichokvaak kho lai kan ti. Cun City Hall hnulei ummi City Star hotel ah ihnak khan pahnih booking kan tuah.
October 27, 2023 hi Charles an sianginn khar lio asi le chun suimilam pakhat in kan pawk. Kan taxi kha kan hotel umnak Maha Bandoola Park Street (hlanlio ah Barr Street anti) luh ai tim i thirhling in an kham. City Hall zong cu avelchum in an kham ve. Cuka cun kar kuahra lawng hla cang kaw kan ke in kan kal ko lai kan ti i an duh lo. Achunglei in pakhat pa ara le Anawratha Street lei in hong lut uh ati. Cun kan taxi driver pa nih 35 th Street in kal ding kha 36 th Street in akan kalpi. Cuhnu ah Anawratha lam tlawmpal kan zulh hnu kehlei ah kan imer i Maha Bandoola Park Street lei cun kan lut.
Dot ruknak ah ihnak khan pahnih ah kan lut. Kei le Charles Room 606 ah kan um. Helen le anulepa Room 607 ah an um. Cuka cun City Hall acung le hmun dangdang alang. Tlawmpal kan idinh hnu ah Botataung Jetty 4:30 PM phan ding in taxi kan hlan. Driver pa cu upa asi cang le kan kal duhnak ahngalh tuk.
Botataung Pagoda hi hlanah ka phan bal. Editor ka rak ṭuan hmasa nak the Guardian Press thlangte ah asi le puai caan ah kan kal bal. Tuan nawnah kan phan. Royal Green River Cruise timi tilawng kampani asi. Prince timi le Princess timi tilawng tafar phun deuh an si kan ti lai cu. Prince angan deuh le Princess ahme deuh. Kannih kha Prince ah kan um. Ruah asur caah tangdot ah an kan luhter. Online in ticket cawk cia asi le Nancy & Family ti in cabuai pakhat reserved an rak tuah. Kan chung tein thilrang kan ihruk le midang nakin kan cuang deuh rua ka ti. An kan zoh lengmang. Generations pathum (keimah, ka fa, ka tule) zong kan si cu mu. Kei kha cowboy hat kai chinh le cu zong cu mi nih zoh an duh tawn. Hi hna hi zei miphun hme an si hnga. An putar in an hngakchia nu tiang an sital ko e anti lai ti ka zumh. Kan ṭhut caangka in theithu hang (orange juice) hraitan cio an kan peek. Duh le mah tein ilaak ṭhan khawh asi. Ti aduhmi nih ti uum ti tap (timerh) in donh i ilaak khawh asi.
Ticket pakhat ah K25,000 asi le rawl ai tel. Kei zanriah ahcun rawl kel ka ei lo. Buffet (bufe tiah rel, mahte rawl ilaak khi asi) le kei cu kai laak lo. Hngakchia pahnih zong nih aluu chuang caw an duh deuh le aman in kan cah piak hna. Myanmar Beer nan nei maw ka ti le kan nei lo anti. Din ka duh bia siloin ralkap ta an zuar le zuar lo theih ka duh caah asi. Cun an neihmi Tiger Beer thol khat ka ding.
Tilawng cu 5 PM ahcun ai thawh lo. Ruah asur caah maw asi caan an hmaan lo bia dek. Ai thawh hnuah khan hlasa pawl an ra le Kawl hla he Mirang hla he an sa. An thiam ngai ve ko. Ringawn thawng atheih caangka Helen cu alaam. Music aum ahcun laam phung hrim arak si ko rua. Hngakchia hmanh nih an theih. An mizohkhenh ning (service) cu aṭha ngai ko. Upatnak tein an kan chonhbiak. Hngakchia zong an dawt hna. Balloon hna an ṭhenh hna.
Tilawng cu suimilam pakhat akal i suimilam pakhat akir ti phun asi. Ruah cu sur kaw acungah kai awk aṭha lo. Akam leiah kan kal le tivapi aluan thluahmah le hmunhnawm afenh thluahmah kan hmuh. Ruah ahan deuh hnuah cungdot ah kan kai. Cun dotthumnak aum nain akhan ahme. Dir buin khua chuanhnak le hmanthlaknak ah ṭha. Kanmah chung zong hmanthlak kan duh le lamnai cem ummi ramdangmi pa nih akan thlak. Asia miphun sidawh asi. Mirang cu kan hmu hna lo.
2023 kum hi Yangon ah ruah atam tuk. Kan kal ni October 27, 2023 hmanh ahcun ruah asur le atuk ngai fawn. Khua kan cuan kho lo. Kal aduhmi nan um ahcun ruah dih hnu thlapa lai hrawng kal ah aṭha hnga. Arfi le thlapa fiang tein nan hmuh lai.
Tilawng ciit dih hnu kan tlung cang lai tiin tilawng in vulei lei kalnak hlei (pier) cungah kutdok (beggers) tampi an um. Hngakchia kum ruk kum sarih hrawng hna, hngakchia ai puakmi nu hna nutar patar an tampi. Arannak in kan tli thluahmah le ahohmanh phaisa kan ṭhen hna lo. Lam kan phanh lai ah Charles pa nih hikate ahhin rak um ulaw taxi ka va hlang lai. Cun kan auh tehna lai ati. Hngakchia le an nu he cuka kan dirnakah hngakchia pate ara le phaisa akan hal. Zahnih ca tlawmpal kai sanh le pakhat ka peek.
Cun hngakchia dang pakhat ara le ka peek ve. Cun adang pakhat ara le ka peek ve. Adang an ra ti hnga maw ka ti le an ra ti loh. Inn kan phanh hnuah K200 nih arti pumkhat acaw kho lo ti an ka chimh. Arti pumkhat ah K300 asi cang anti.
Kan kirlei ah taxi driver cu Sule lei in kan hotel ah luh khawh asi lo kan ti nain luh khawh asi ko ati. Cun alut kho ṭung lo le 35 th Street in kan ihel ṭhan. Hotel kan phan le kei cu mitkuh thawtnak kai kenmi ka ding. Charles pa nih ameh ka neih lomi hmu kaw tangah ava ṭum le aphunphun avon cawk zapi ei awk he. Helen cu an ihnak le kan ihnak ai chok lengmang. Kan ihnak ah akai aṭum. Akai aṭum. Ihphah le puan araangmi ka uar ati.
Athaizing cu tuan tein kan tho. 7:30 AM ah breakfast ei azat hlan deuh ah kan ei. Cu khawh cun Anawratha Street in Sule Square le Sule Shangri-La in City Square le Bogyoke Market lei ah kan vai chok. Public Holiday (zungkhar ni) asi caah maw zeidek hotel le market pawl an khar. Cuka cun Maha Bandoola Park leiah kan ra. Kei le Helen cu kan ba pah. Sule Square innka hramah kai din. Park cu City Hall lei in luh khawh asi lo. Thirhling kual in an kham. Barr Street lei zongin luh khawh asi lo. Sule Pagoda Road lei in kan luut. Park ahcun kei le Charles nu cu thingkung tang ngaidem ah kan ṭhu. Helen le apa an ichok pah. An icawipah. An ihruaipah. Charles cu akenkip ah atli. Anih cu akal bal loh. Atli peng. Exercise tuahnak aphunphun avai ciit. Minit pakhat ah aṭum ṭhan lengmang. Energetic asi kan ti lai cu.
Cuka cun Van Bawi te dawr Maha Bandoola Park Street (Barr Street) ah kan kal. Sahlawh rualchan kan si le an dawr va hmuhpiak hna usih law va bawm pah hna usih kan ti. An dawr min ah Tony Mart anti. Anmah chung an um lo le Asho Chin tlangval pate lawng arak um. Kan herh lengmangmi pawl thong sawmnga man hrawng kan cawk. Anmah bantuk mini Mart hi an Block ah anmah lawng an si le an manh ngai lai tiah cu lam i aummi Pu Hrang Uk nih akan chimh.
Cun kan hotel ah kan kal. Tlawmpal kan idinh hnu ah kan thil he 11:30 AM ah kan chuak. Kan ratlei ah 36 th Street ah Blessing timi Lai dawr kan hmuh le cucu kan fuh. Laimi le Laimi ibawm usih kan ti. Cu ni Oct 28, 2023 cu Lai kumthar rak si kaw eidin man vialte 20% kan ṭhumh an rak ti. Laithil ai hruhmi cu 30% discount ti arak si.
Dawr neitu hi Falam an si. Sabuti le rawl phunphun an zuar. An dawr cu aṭha ngai. Ṭhutdan cabuai thar tete asi. Cabuai asau deuhmi paruk ṭhu le atawi deuhmi pali ṭhu in an um. Cabuai ka rel le 12 maw asi 13 dek ka hmuh khawh. Rianṭuantu zong uniform ai hrukmi hna an um. An menu ṭialnak zong aṭha ngai. Vaampang zongah Lai thilri hmanthlak tete an taar. Kan um lioah Gret an bawinu Murielle Morrison le anpa zong an ra ve. Lai zu (khawngzi) zong an zuar. One Litre thawl khat ah K10,000 asi.
39 th Street zongah Lai dawr aum anti. Yangon khuachung aphanminihcun va bawm cio hna uh. Kan kirlei ah Charles nu phaisa hlam ding anei le Hakha Mann ah ka lutpah. Taxi man det loin K15,000 apeek. Kan umnak sang East Gyogon hi Mingladon Airport he ai naih. Cucaah kan cungah vanlawng azuangmi kan hmuh lengmang. Fighter jet (raltuknak vanlawng) hna azuan ahcun athawng athang tuk le Helen he kan hna kan iphih tawn. Cun azeimawchel ah vanlawng ciit ka duh ati. Mi nih vanlawng kan iciit anti ahcun ahngar hna le vanlawng ciit aduhnak azual. Vanlawng ciit akan hauh tawn. Tilawng cu kan ciitpi cang le vanlawng belte zeitik talah kan ciitpi kho tehnga dek maw. (8/11/2023)