2015 Thimnak ahhin aho nih dah atai lai? Chim ahau lo. NLD nih atai ko lai. Zeicahdah na chim khawh? nan ti ahcun atanglei hi rel hmanh u. Nan hngalh cio bantukin NLD party i an hruaitu cu Daw Aung San Suu Kyi asi. Amah cu Kawlram luatnak akan laakpiaktu Boyoke Aung San fanu asi. Aung San cu Kawlrammi vialte nih dawt le upatmi asi. Cucaah afanu zong dawt le upatmi asi cia. Cuhleiah Daw Aung San Suu Kyi hi afim bak. Athiam bak.
Vuleicung minthang Oxford University ah ca acawng balmi asi. UN ah rian aṭuan balmi asi. Mirangholh le Japan holh le Kawlholh in ca a ial balmi asi. French holh zong athiam. Bia achimmi atha tuk. Ading rih. Amah zawn nakin kawlrammi vialte zawn aruat deuh. Nobel Prize ahmuhmi tangka le adang lengluang mi bomhnak ah ahman. Hi vialte hi Kawlrammi nih an theih. An hngalh. Ramdangmi nih an theih an hngalh. Ramdang hruaitu vialte nih an hngalh. Cucaah an upat. Hluttaw kuzale lawng asi rih nain (mizapi hruaitu zong cu asi) ramdang cozah nih tlawn an sawm lengmang. Atlawng lengmang ve hna.
President le Prime Minister bantukin an komh. President Thein Sein nak in tlawn an sawm deuh. Ram tamdeuh ah akal. Hiti tlawn an sawmnak hi hmailei ah Kawlram hruaitu asi lai ti an hngalh. Hmailei ah nawl anei te lai tiah an ruah. Atu zongah nawl anei ti khawh asi. Bia achimmi lengluang nih Kawlrammi tampi acawnpiak hna, ahruai hna. Cucaah Kawlrammi vialte hei ti awk nih hmailei ah Kawlram President site seh ti an duh. Afale ramdangmi an si ca bel ah president cu si khawh dawh asi rih lo. Asinain 2015 thimnak cu amah hruaimi party, amah duh ning azulmi NLD party nih an tai ko lai.
1990 thimnak kha zalente le ding tein an tuah caah Kawlrammi an duh ning in thil akal. Pyithu Hluttaw hmun 485 chungah hmun 392 NLD nih atai. Zakhat ah 82 (82%) asi. Cu lioah amah Daw Aung San Suu Kyi cu inn ah thong an thlak lio asi. Bia achim kho lo. Biachim ahau lo. NLD cu amah hruaimi party asi caah mizapi nih NLD cu mee (vote) an peek ko. Ahnu kum 22 ah mizapi nih NLD an duhnak azor rih lo I 2012 kum by-election an tuah lioah hmun lawng 44 chungah hmun 43 NLD nih an tai. Shan ram ah Shan party nih hmun khatte an tai ve. Kawl umnak poh ah a ummi hmun dih lak in an tai. Mee fir umlo tein thimnak zalente le ding tein an tuah poh ahcun NLD nih an tai ko lai.
1990 lio ah khan ralkap tam nak khua Mingaladon tehna Meiktila tehna hmanh ah NLD nih an tai. Mingaladon ahcun ralkap ttanhmi NUP hotupa kha NLD minote nih atai. 2012 by-election ah khan Nay Pyi Taw in anmah cozah party (USDA) an khualipi ah NLD nih an tai hna. Atu zongah Kawlmi zapi nih Aung San Suu Kyi le ahruaimi NLD party ṭhiamṭhiam an duh bik. Nifate tadinca le journal kan relmi in ai thei ko. Aung San Suu Kyi hmanthlak in an khat. Amah uarnak le amah nih ram ahruai awk asi ti in an khat. Abia chimmi an ṭial. Bia achimnak poh ah minung asing le asang in an ra. Sawm an hau lo. Tangka phalh an hau lo. Nai July 12,2014 Pakkokku i mi an tam khawh ning kha ahmantlak nan hmu ko lo maw? Laimi hmanh an tamtuk khah. Cucaah 2015 thimnak zong hi 1990 le 2012 thimnak bantuk ṭhiamṭhiam asi lai. NLD nih an tai cikcek lai. Kha kha atulio cozah tlaitu nih an hngalh. An hruaitu hrimhrim hi Hluttaw kuzale hmanh hmu kho loin NLD party in ai cuhmi nungakte hmanh nih atai khawh men ti kha an hngalh.
Cucaah party hruaitu palinga tal Hluttaw kuzale si khawhnak afiangmi PR thimnak ning hman an duh. Asinain PR thim ning asi zongah NLD nih Kawl rawn ahcun atai ṭhiamṭhiam lai. Amyotha Hlutaw lawngah kan hman lai. Cun Pyine ahcun kan hmang lai lo anti. Cucaah Amyotha Hluttaw hmun 168 chung ah Kawl rawn ah hmun 84 lawng ah hman asi hnga. Hi zong ahhin mizapi nih aminung in mee pee loin aparty in mee peek asi tawn ko caah NLD thiamthiam nih mee tambik an hmuh ko lai. Tlangcung belte ah tlangcung party tete nih an tai pah ve lai nain tlangcung mee le hmun cu atam lo.
Cucaah 2015 thimnak hi NLD nih atai lai. An hotu Daw Aung San Suu Kyi bel president hmuh khawhnak dawntu neih peng dawh asi. Cucaah mi theih set lomi NLD pa nih president ṭuan te dawh asi. Asilole 88 Generation chungin pakhat khat president an si kho. Cu zong cu NLD nih an thim lawngah asi kho hnga. Hiti ka timi hi NLD party ka si caah asilo. Zei party hmanh ah ka luut lo. Zei party hmanh ka ṭanh lo.
Catialtu nihcun mah hmuh ning tein ṭial phung asi. Nifatin ka hmuh theih ning in ka ruahnak ka ṭialmi asi ko. (14-7-2014)