Kum 2015 ah kan theihmi Kokang ral thawng cu nai March 6, 2017 ah kan theih than. Laukkai khua pawnghrawng ummi ralkap le palik umnak le khuachung hmun cheukhat kha Phon Gyar Shin homi Kokang ralkap nih an luh hnawh hna i an ṭhuat hna. Hiti Kokang ralkap an lut lai tihi an luh hlan zarhkhat duh ah khan theih cia asi cang. Laukkai khua le pawngkam ralkap umnak kha Kokang ralkap nih an luhnawh hna lai caah cuka ummi ralkap nupi le fale zam viar uh tiah Shan State palik bawi nih ati hna.
Kan hnulei kumhnih deng Laukkai ral lio zongah hiti tein arak si. Kawl cozah tuk ding in Phon Gyar Shin ralkap an lut ṭhan lai tiah Tuluk ram tadinca in an rak au. Arauh hlan ah an lut taktak. An itu i sualnak nei lo mi sawsawh le ralkap bawi tampi an rak thi. Atu zong an ra lai tiah zarhkhat duh ah thawng an thanh i an ra taktak. An ituk zing ah misawsawh panga le mawtaw PK panga le ralbawi cheukhat an nunnak aliam. Mei alawn i tangli sianginn sayama zong athi tiah ralkap zung nih thawng an thanh.
Laukkai khua le a pawngkam raldoh hlan nithum ah Nay Pyi Taw le Yangon ah tlangcung hriamtlai bu hna i an ai-awhtu pawl le Daw Aung San Suu Kyi an itong i remdaihnak an caih. Cu an itonnak cu remdaihnak caah athalei apanh tiah President Zung i Deputy Director General asi i biachimnak nawl a neimi U Zaw Htay nih achim. Asinain cu thawngpang tha cu sau arau lo. Kutkkai myone chung ummi Lashio-Muse Union Highway kam ummi ralkap umnak cheukhat cu KIA le TNLA nih an tuk hna i ralkap cheukhat an thi timi thawngpang le Laukkai an hong tuk timi tadin cu hnuhmai zul in theih asi.
Laukkai tuk ni bak ah Daw Aung San Suu Kyi zung nih thawng thanhnak pakhat an chuah colh. Hriamnam tlaih hi kaltak ulaw cabuai cung remdaihnak caihnak leiah rat kan sawm hna tiah ati. Phon Gyar Shin homi Kokang pawl zong nih zeicahdah kan ituk timi fianternak thawng an thanh ve. January 19, 2017 ah cozah ralkap nih meithal hme he meithal ngan he Kokang ralkap umnak an hong kan kah. Kokang le kan hawile he kan ci mit dihlak in tuah an kan timh anti.
Ralbawi ngan bik zung nih an chim venak ahcun Kokang pawl nih Mongko le kadang he an kan tuk. An hmun laak than duh ah asi anti ve. Afekmi hmunhma zong an ser ti kan theih. Kha hmunhma laak thannak caah kan tukmi hna asi anti ve. January 19 in February 11 tiangah voi 56 kan itu anti.
Kap hnih chimnak ah Kokang umnak ahhin nifate ti awk in kan ithua lengmang le khuachung tiang aphan. Cucaah cuka ummi hna cu athongthong in an zaam. Ralzaam hna lakah Laukkai khua i kadang in rian ahong ṭuanmi zong Lashio le Mandalay palpah in an umnak khua cio ah an zaam. Kum 2015 lio Laukkai khua idoh lio zongah cuti te cun arak si. Tuluk le Kawlram ramri aummi sipuazi aṭhatnak Laukkai khua ah rian ahong tuanmi Kawlrawnmi zong thinphang lengmang in an khualei ah an zaam. Lampi zongah kah an tong rih hoi.
Daw Aung San Suu Kyi le acozah lei nih 21 st Panglong Conference kan tuah lai anti cuahmah lioah Kawlram chaklei ahcun hriamtlai bu tampi le Kawl ralkap cu nifate an iṭhua lengmang ko. Cu hriamtlai bu vialte le Kawl ralkap cu kahdaihnak an tuah kho lo. Cu hna pawl Kawlram Dihlak Kahdaihnak Hnatlaknak (NCA) zongah itel ve ding asi kho rih lo. Tuluk Han miphun kan si ai timi Kokang hi Kawlram remdaihnak tuanbia ahhin an biapi ngai. Kawl ralkap i an ral nganpi arak simi Burma Communist Party (BCP) an rak ṭhio dih hna lioah Phon Gyar Shin homi Kokang ralkap hi an biapi ngai.
Hlanlio BCP ralbawi pakhat arak simi Phon Gyar Shin hi BCP in achuak i amah tein ralkap anei i cozah he remdaihnak an rak tuah. General Khin Nyunt chan lio ah khan asi. Acozah zong nih remdaihnak tuahṭi tu bu ah achiah hna i an umnak hmun cu an peek hna. Cu khawh cun Laukkai khua zong cu aṭhangcho thluahmah i Tuluk chawlet pawl an bualcelnak minthangmi khua ahong si. Kum 2009 ah khan Phon Gyar Shin phu cu Kawl ralkap he an irem lo i an zaam.
Cu hnu ah Phon Gyar Shin nih Laukkai kha laak ṭhan aduh. Cu nihcun nihin buainak hi achuahpi. Vanchiat ah cu nihcun Kawlram remdaihnak khuakhan lairel cuahmahmi hi faakpi in ahnursuan. March 6 i ai thok ṭhanmi ruangah ralzaam hi athong an phan cang tiah bomhnak peetu NGO nih anti. Kokang pawl chimnak ah atu zong ahhin an ikap pah lengmang ko anti.Acozah le ralkap cu hi kongah ralring tein aummi an lo.
An ikah ni bak ah thawngthanhnak an tuah colh nain ahnu ah zeihmanh aum ti lo. Hlan deuh ahcun nitin an idohnak, thihlohnak, chuhṭhanmi kong an thanh lengmang. Nihini tiang athilo cazin an chim lo. Kum saupi duhsah tein a-alh pengmi favai mei bantuk asimi hi ralrin tein an tonghtham. Kawl ralkap nih cu mei hmih dingah atanglei bantukin ralrinnak apeek hna. Ram Pumpi Kahdaihnak Hnatlaknak (NCA) min athu lomi tlangcung hriamtlai pawl le ralhrang pawl cu aherh ning in kan tuan lai ati. Kokang ram ahhin daihnak um dawh cu asi rih lo. (Mah hi cabia hi the Voice Weekly nih March 6-19, 2017 ni ah achuahmi Naw Ko Ko tialmi kan lehmi asi) (11-3-2017)