Kan u le chan lio ahcun taang hleili aung ka nih myo-uk le vuanthawk hmuh khawh arak si. Asinain kan nih chan ah cun asi ti lo. Mah cawnmi he aa pehtlai in sibawi le lambawi bel hmuh khawh asi. Taang hleili aung paoh camipuai in an i zuam i aṭhawng mi nih hmuh khawh ti arak si lo. Cu ca-ah kan nih chan ka timi kan hnulei kum 15 le kum 10 hrawng ah hin mi tampi cu IDC le UDC ṭuan asi. Kan chan achia kan ti lai ta.
Asinain atu cu caan ṭha aphan ṭhan cang. Myo-uk le vuanthawk sawk khawh le hmuh khawh asi ṭhan cang. Kan hnulei kum thum kum li hawng in biatak in asi kan ti khawh.
Myo-uk ka timi cu lahkhah 300-12-420 asi lo le 320-15-440 pawl khi an si. Hi pawl hi an mah le azungpi cio nih auh in thim asi. Kum mah nak cun tam hlah she ti ngawt asi. Vuanthawk ka timi hi kahkhah 450-25-700 asi mi an si. Mah bantuk pawl cu zei bantuk zung ca poh ah Public Service Selection and Training Board nih auh piak le thim piak asi. Kum mah zat lawng ti hi atlawm lo.
Rian sawk tikah zoh ding ca cu Notification (General) 1/82 in thawng thanh arak si. A tawinak in chim ahcun (1) Mirang ca, (2) Theih awk hngalh aw, (3) Party ruah ning le (4) Kawl ca an si.
Laimi hi mirang ca ahcun miphun dang nak in kan thiam deuh. Zeidang ah kan tluk fawn ko hna. Camipuai lai zongah zoh khawh asi ko. Kawl ca zongah aholh ah cun an kan tei na-in aca ahcun an kan tei lem lo. Cu pinah Mirang ca hi camipuai lai ah ka zoh lai i ka thiam ko lai ti awk aṭha lo. Rak thiam nawn cia ahau. Cu ca-ah Mirang ca thiam kho rian hmuh nak asi i Laimi nih kan thiam fawn ṭung i kan nih ca-ah rian hmuh afawi ko.
Cu ca-ah rian ahmu rih lomi le rian aa lungsi lomi taang hleili aung mi nihcun ni fate dadinca i an thanh mi rian hi sawk lengmang, phit lengmang, sawk lengmang, phit lengmang, sawk lengmang, phit lengmang ahcun nikhat khat cu bawi si khawh asi ko tihi lung ṭhawnnak peek kan duh hna.