Nai hrawng cu America nih Iraq atu lai maw tu lo ti hi thinphang in kan thin adomh in kan i domh. US President George W. Bush aa hrocer ning ahcun tuk dawh bak asi. Vice-President Dick Cheney le Defence Secretary Ronald Rum feld zong nih tuk an duh ve. Asinain Secretary of State (Ramdang Vuanci) Colin Powell le achangtu pa nih cun tuk an duh rih lo. Anmah le anmah chungah lungkhahnak aum lo.
Bush le avuanci pawl chungah mupi (hawk) le ṭhuro (dove) in an i ṭhen. Mupi an timi hna cu ahraang i raltuk aduhtu pawl an si. Ṭhuro timi pawl cu anemmi, daihnak aduhmi pawl an si. America ram i nainganzi tama pawl le an tadinca pawl zong mupi le ṭhuro in an i ṭhen tung. Mupi le ṭhuro pawl nih Bush kha anmah lei ṭang dingin heh tiah an chimh cio. Asinain Bush nih alung aa thlek kho rih lo.
Mupi le Ṭhuro
Mupi lakah an hotu cem cu Rumsfeld asi. Mupi dang pawl cu Cheney, Richard Perle (Pentagon Advisor), Tom Delay (House Majority Whip), Paul Wolfowitz (Deputy Secretary of Defence) le Eliot Cohen (Author-Professor) te hna an si. Ṭhuro lakah an upa bik cu Powell asi ve. Ṭhuro dang pawl cu Dick Armey (House Majority Leader). Richard Armitage (Deputy) Secretary of State), Larry Eagledbuger (Former Secretary of State), Breni Scowcroft (Former National Security Advisor) le Chuch Hagel (Republican Senator) te hna an si.
Zeicaahdah Iraq Tuk Cu An Duh
Iraq nih hin cikkhat ah mi tampi thah khawhnak hriamnam (weapons of mass destruction = WMD) a ngeih ti asi. Atu i angeih rih lo hmanh ah aser lio i angei chom lai ti asi. Cu hriamnam pawl cu iological, chemical le nuclear hriamnam te hna khi an si. Iraq president saddam Hussein nih cun kan ngei lo, kan ser lo ati. Cu tikah nan ngeih le ngeih lo nan ram ah kan ra lai i kan zoh lai tiah UN nih arak ti. Kan hnulei kum li hlan hrawng ah UN Weapons Inspector pawl nih an va zoh lengmang.
Asinain an kal duhnak paoh ah an kal kho lo. An zoh duhmi paoh an zoh kho lo. Iraq ralkap pawl nih kalnak nawl le zohnak nawl an pee hna lo. An pek hna hmanh ah zarh hnih thum hnu lawng ah an kal duhnak ah an kalter hna. An zoh duhmi an zohter hna. An hriamnam an thuh hmasa hnu lawngah an zohter hna. Cucaah hriamnam cekhlattu (UN weapons inspectors) pawl cu an lung atling lo i an kir ṭhan i an kal duh ti lo. Cu Iraq nih dawnkhantu ngei loin WMD cu aser cuahmah ko tiin ruah asi. Ni khatkhat ah kan i rin lo kar ah akan tuk lai ti an phang. A kan ṭhuat hlan ah kan den hmasa (preemptive strike) ah aṭha lai. Sau deuh kan zoh ko ahcun kan tlai tuk sual lai ti George Bush nih aphang.
Saddam Hussein Misualpa
George Bush a phanmi i amawh lo. Iraq President Saddam Hussein hi asualnak chim cawk lo asi. A innpa ram Iran, Syria, Israel le Kuwait hna arak tuk hna. Amah rammi Kurd miphun le Shiites pawl zong aṭhuat hna. Vawlei cungah zinan tam bik angeitu Saudi Arabia changtu asi nain angei bik si aduh ruangah zinan tampi angei vemi Kuwait zong 1990 kum ah arak laak. Zinan tam bik angeih i ‘ka zinan ka zuar lo’ ati ahcun Nitlaklei ram cu harnak ngaingai atong ding an si. Saddam Hussein nih amah duhning in Nitlaklei ram pawl cu an chaak amerh khawh hna ding asi.
Cucaah cun America le ahawile vialte an i bawm i Iraq ralkap paw cu Kuwait ram in 1991 kum ah an rak dawi hna. Cu ral cu Gulf War tiah min an rak sak. Desert Storm ti zong in an auh. Iraq ralkap zaam pah in lampi a ummi Kuwait zinan khur vialte mei in an rak duahpiak hna. Thla tampi hmih khawh loin an rak kaang. Cu lio i US President cu atu lio US president i apa a si. Ralbawi ngan bik cu Colin Powell hi arak si.
Hi caah hin Bush nih Hussein cu arem in arem lo. Iraq le Iran le North Korea zong hi Bush nih “Axis of Evil” (Misual Lungthu, kan ti hnga maw) arak ti bal hna. Cucaah Bush aduh taktak mi cu Iraq tuknak in an president Saddam Hussein thlen/umter ti lo hi asi. Regime change hi asi deuh.
Aho Hmanh An Hna A Tla Lo
America nih Iraq atuk dingmi hi vawleicung ram vialte ahohmanh an hna atla lo. 1991 kum Gulf War lio ahcun vawleicung ram vialte nih America an bomh dih ti awk asi. Atu cu Russia le Tuluk le Japan cu chim lo America i aNATO hawi le hmanh an hna atla lo. Britian lawng nih ahna atlakpi ti khawh asi. Europe, Asia, Africa, America tlanglei le Middle East tiang zong in an hnatlakpi lo. Iraq ram pawngkam aummi America hawikom i ruahmi Saudi Arabia te hna Egypt te hna i Turkey te hna Jordan te hna zong an hna atla lo.
Cucaah ramdang mi nih America cu mah nawl khuasa (unilateralist) an ti i an rem set ti lo. September 11,2001 lio ahcun American kan si cio ko an rak ti nain atu cu an zaangfahnak an philh dih. 1991 kum lio i America nih Iraq atuk lio ahcun an rak bomh dih. An ram le an vanlawng dinhnak zong an rak hmanter. Atu cu Kuwait le Qatar bel nih an ram an hmanter hnga maw ti lawng asi.
Tuk Duh Lo Pawl Bia
Tuk duh lo pawl nih cun Iraq nih mi tampi cikkhat ah thah khawhnak hriamnam cu angei hrimhrim ko ti kan thei lo. Zeiruang set ah kan tuk hnga ti awk aum lo. Iraq nih zeiti hmanh in akan ti lo an ti. Cun Colin Powell hna nih cun ramdang nih an kan thohkhan lo ahcun asi kho lo ati. Hriamnam hmang rih loin kan hmurka hmang ko rih usih ati. Micheu nih UN Weapons Inspectors pawl Iraq ram ah kal ṭhan hna seh. An duhnak paoh va zoh hna seh. Cucu Saddam Hussein nih aduh lo bel ah phomh ding asi. Cu hnu ṭhuat cu ramdang thohkhannak tal kan tong deuh lai an ti.
Bush Nih UN Ah A Chimmi
September 12,2002 ah US President George W. Bush nih UN i bia achimmi ah Iraq nih UN Security Council nih bia an rak chahmi vialte zulh hrimhrim fial i azulh lo ahcun kanmah lawng nih kan ṭhuat ko lai hih ati. Cu hnu ah Saddam Hussein cu athinphang kaw UN Weapons Insectors pawl cu ra ṭhan ko hna seh. An duhning paoh in an duhmi paoh rak zoh ko hna seh ati.
A Tu Taktak Lai Maw?
Asinain America nih Iraq hi azum lo. Vice President Dick Cheney zong nih hriamnam zohtu an kal ṭhan zongah zeihmanh ai hlei lai lo ati tawn. UN Security Council nih biakhiahnak athar in Iraq hi zulhter ahau tiah America nih a ti. American ralkap zong nih raltuk awkah timh tuahnak an ngil lo. President George Bush zong nih Congess ah Iraq tuknak nawl asawk. Cun Bush zong nih hin ṭhuro pawl bia nakin mupi pawl bia hi azawn deuh. Cucaah America nih Iraq atu taktak lai maw, zeitik ahdah atuk lai tiah hngah cio asi. Acheu nih Muslim puai Ramadan adih hnu Christmas hlan ah an ti. A cheu nih kumthar hnu ah si dawh asi an ti. Hngak cio ko ne u sih.
(Muko 2002 Sep)