Mihar ah Watte ka phan ve. Watte cu Chaungtha chak deuh rilikam khua asi. 2002 kum LBC Youth Camp an tuahnak hmun asi.
LBC mino cu Chaungtha hmuh duhah khemh kal lai cu an i ngaih tuk. Cu lakah ka fale zong an i tel. Kapa ra ve ko, Thingya (titoih puai) chung vialte zung nan kai ṭung lai lo i nangmah lawng na um ahar lai. Rawl chuan piaktu hmanh na ngei lai lo. Rawldawr hmanh an khar dih lai, an ka ti. Nanmah ngakchia sinah cun zeidah ka tuah lai ka ti hna.
A hnu deuh LBC pumh chuahka ah Dr Tam Aung Ling nih mino hotu theih hngan ah Watte ah ra ve aka ti ve hoi. Chun hnu ah mino pawl cu an vai caih i keimah kha Watte kal sawm ve dingin an khan. Nungak tlangval sinah an ra i kan pastorte khual an tlawng thlu i cawnpiaktu kan bau ko. Ra ve law na duhmi paoh na kan chimh lai. General knowledge asi zongah zei asi zongah. Caan hnih kan in peek an ti. Chaungtha hmuh bal cu ka duh pah ve, mino sin kal zong cu ka duh pah ve i “e” ka ti hna. Mihar ah Dar Al an timi khi ka si ko.
Kan kal ni ahcun LBC Centre ah zingka teah kan phan cio. Mino upa pawl nih mi an kan chek dih. Kan thil zongah kan min cio an thlaih dih. Vanlawng khualtlawng lai ko kan lo. Kan mino pawl cu aphunphun in an i thuam i an siṭal tuk. Model ṭuan kho ding an tam. Mah tluk hin maw kan mino pawl hi an rak i dawh ka ti.
Bus ngan pipi (hmaanlung) pahnih in akal ding kan si. Ruahnak nakin mi kan tam deuh caah ṭhutnak ting lomi an tam. Alai i thil cung aṭhumi an um len.
Lampi ahcun mino pawl cu an ra alawm tuk i hla lawngte an sa. Asinain Kawl hla lawngte an sa. Motor dangah teh Kawl hla ṭheu mu an sak ve lai tiah ka lungthli in ka ti. Lampi ah zoh dawh zei hmanh aum lo. Bo Myat Tun Hlei chim lo cu.
Watte phanh hlan meng 15 hrawng cu lam achia. Leidip in akhat. Watte kan phanh ahcun kan mui hmanh hliah khawh lo tiang in leidip akan khuh dih. Hmaanlung an ti nain alung nemmam lo. Hmangsom lio i nakdup i kan um i kan ha vaar lawng alangh bantuk khi asi.
Watte khua kan phanh ka in tlun inn an kan phawt. Tlun inn phawt ti tikah riahnak lawng asi. Rawl cu kanmah tein kan i chuan. LBC nu upa le rual-u deuh ai chiami nungak pawl nih an chuan. Kannih cawnpiaktu pawl cu sayate tlunnak pastor inn ah an kan chiah ve. An pastor pa Yangon akal lio asi i atlung rih lo. Asinain ṭhate in an kan zohkhenh. Kholhnak ti an kan thanpiak. Kan thil hna an kan sukpiak. Asinain kei le Dr Tam Aung Ling cu pastor si ṭunglo i pastorte tlunnak i tlun cu kan sia arem lo. Kan zaa along lai lo kan ti. Cucaah rak kan ṭhial u kan ti i lamhlat deuh tarpa le atunu lawng umnak ah an kan ṭhial.
Kan tlun inn kan phak ahcun pher phah cia le chantling chiah cia in arak um. Cu bantuk cun inn kip ah tuah cio asi an ti. An khuapi ta arak si. Aman lo ti asinain kal lai ah laksawng sian tawk peek asi an ti. Lai lei zong nih i cawn ve hna selaw ava ṭha hnga dah ka ti.
Dr Tam cu khua kan phanh cangka in aha phawinak thilri redi tein achiah. Watte mi hafaak le ha ṭha lo phawi pah dingin ai tim. Asinain a mizaw hmasa bik cu LBC nungak dawh bik asi. Sibawi pawl hi an i miak pah tawn mu ka ti. Ahnu ah hafaak zong cu an ra ve nain an tlawm. Kan tlun inn tarpa nih kan khua ah hafaak an tam bal lo ati. Zeicah dek asi hnga.
Kan tlun in nih ihkhun pakhat an ngeih i Dr Tam nih nang it aka ti i keimah ka it. Ka ihnak cung zawn ah taukte (awmufwJh) timi aum i zan fate aka hro lengmang. Voikhat hro ah voi riat voi kua aawn. A hram thawk ah aaw adin i ahnu deuh ah athang deuh lengmang. Adonghnak lai ahcun aaw acher. Aaw alai i adin deuh tawn. Cu nih cun zanlai ah aka ṭhangh tawn i apoi deuh.
Inn ngeitu nih ungthei an ngeih tung i Dr Tam nih aduh tuk i zing he chun he zanlei he acawk hna i adin lengmang. Inn ngeitu tangka an hmu ngai lai. Kei cu ka ding ngam set lo. Thhi kainak asi an ti caah.
Kan tlun inn ah thlalang aum lo i Watte kan cam chung vialte thlalang bih loin kan um. Kanmah le kanmah kan i zoh i nang cu na ṭha ko, nang cu na ṭha ko kan i ti. Pastor pawl zong kan hal hna i kanmah zong thlalang mui kan hmu lo an ti ve.
Watte hi thing tamnak asi i cozah zong nih thing an chuah. Watte khuami zong thing inn ṭhaṭha an sa kho. Lothlawh, nga tlaih, ungthei le unghnah zuar, tihu (cashew) cin hi an pawcawmnak cem a si.
An khua min cu Watte (vok thi) ti asi caah an khua kong cu kan hal hna. Hlan lio kum 150 maw 200 hrawng ah dek an khuahmun ahhin ngal rual a bupi in hmunkhat ah an rak thi. An luruh, an ruangruh le an ke ruh tehna bau lo tein aa pong tung. Cucaah Watte tiah min an rak sak. A hmasa ahcun Kawl an rak um. Atu cu Karen lawngte an si. Karen hmanhah S’gaw Karen lawngte an si. Po Karen an i tel lo. Khrihfa lawngte an si hoi. Cun Baptist lawngte an si rih.
Cucaah cun Baptist Biakinn pakhat lawng an ngei. An pastor pa zong nawl a ngei ngai. “Kan khua ahcun Khrihfa lo cu ka umter hna hnga lo” ti tiang in achim ngam.
Hiti Baptist an si caah hin an khua kong zong cu Baptist Hqrs lei in LBC nih cun kan rak theih ve.
Zarhpi zing cu anmah sinah kan i pum ve. Rev. Sawi Kung le Saya Biak Hnin zong Karen thuam in an ra. Rev. Sawi Kung nih phung achim i aṭha ngai fawn, atawite fawn i an duh ngai. Saya Biak Hnin nih Mirang holh in thla acam i athiam ngai i kan i lungsi ngai. Laimi cu Mirang holh an thiam an kan ti lai kan ti i kan i lawm ngai.
Rev. Sawi Kung le an pastor pa cu pulpit pit chin ah an ṭhu. Saya Biak Hnin le pastor bawmtu pate cu akam lei veve ah an ṭhu. An pastor pate cu midawh ngai asi i LBC nungak nih an uar sual lai ka ti i ka hnah achuak pah.
Watte cu youth camp tuahnak ahcun ṭha kaw bu dang pali hrawng an ra ve. Cu lakah North Okkalapa Karen mino bu zong an i tel. Cu hna zong cu an i pum ve. An hotu pa cu Myitta Taman mekazin Chief Editor asi. Biachimnak caan an peek ve. Cu pa nih cun Jenny hlasak atheih i Sung Tin Par nakin ka uar deuh ati. Bia dang achimnak ah crazy timi Mirang holh ahman in mino pawl nih zei-ahdek an ruah an ni phungmang. An crazy ko lo hme maw ka ti.
An pastor pa nih chairman atlaih chih i program um loin amah duhning paoh in pumh ahruai. Myitta Taman editor pa hna cu Watte na uarnak na chim len ṭung, zeitik hmanh ah na mekazin ah Watte kong na ṭial bal lo avun ti i kan ni phungmang. Keimah ṭialmi te tal hi rel kho sehlaw athin ava hung hnga dek maw. Kan i pumh lio zong ahcun nu pawl zong hlaremh avun fial chom hna.
Zarhpi ni chunhnu ah Falam nurse nu le Watte khuami pa an i um. Cu zong cu cawn cia loin leh athah hna i nih lawng kan rian tiah azoh vemi nih an kan chimh. Kan Lai nurse pawl hi Lairam nih atlum ti hna lo i akenkip ah an chiah hna. An umnak ah va an va ngei thlu te lai ti hi ka phan zungzalmi asi. Nurse nu cu alanghlat in kan hei hmuh i Karen thuam in ai thuam.
Kan um lio ah mithi an ngei celngel. Rev. Sawi Kung nih zan pumhnak ah phung achim i an duh ngai. Kawl holh zong ka ruah lengin athiam. Kan tlun inn tarpa farnu arak si ngelcel. Dr. Tam he kan va kal ve i kan tlun inn pa zong cu ai lunghmuih ko rua.
LBC Youth Camp i an caang thim cu “Nunzia Ka Thiam Cang” ti asi i kei cu ahnu lawngah ka theih. Chun ah Baibal Cawnnak, Hla Cawnnak, Lecture Ngaihnak tiin an tuah. Zan ah talent show le tadinca relnak an tuah i cu ko cu anuam. An tadinca renak ah Dr. Tam cu ngandamnak akan cawnpiak rua lai kan ti i geography lawng akan cawnpiak an ti. Ahnu cawnpiaknak ah atu zong khuaram ṭhiamṭhiam kan cawnpiak hna lai. Asih-ale-paing (ta&SU tv,fydkif;) hi abiapi tuk i cu kong cu kan chimh hna lai ati. Nan theithiam maw tiah voikhat ahal hna ahcun an theithiam lo. Avoihnihnak nan theithiam maw avun ti ṭhan tikah cun an theih thiam. Cun condom hman aherhnak achimh hna. Ahmanning zong nungak pakhat le tlangval pakhat nih an piah (demonstrate).
Cacawn dih hnu zanlei fate cu rilikam ahcun kal cio asi. Tilio thiam pawl cu an i nuam tuk. A cheu cu motor ke an i cit. Tilio thiam lo pawl cu ahnim lawng in kan i hnim. Voikhat cu ngaknu pakhat cengkeuh achar i ka va charpi ve. Cu lio ahcun hmanthlak ding in nungak pakhat nih akan pel. Akan thlak hlanah kan hmuh i, kan thla ko kan thla ko ka ti i akan thlak. Asinain ngaknu dawhte he Watte Beach i hman kan i thlakṭimi cu hmanthlak dang vialte he an tlau dih. A va poi dah. Cawnpiaknak i bia ka chimmi ah hmanthlak ṭhate ken le fim hi nunzia thiam pakhat ah ka chimh hna.
A dih lai zan cu Watte Beach ah meiphu kulh in tuah asi. Aalu hna an rawh i an kan phawt. Athaw ngai. Kan ngakchiat lio ka thei. Laksawng peeknak te hna, lentecelhnak te hna an tuah. A hnu ah hla an sa. An hotu pa ka sinah ara i Kawl hla sak ve kan duh a ti. Sa ko u, sak kan in thlauh hna lo. Lai hla hi usa pee u kan ti tawnmi asi ka ti. Cun ṭin cang usih ka ti i Dr. Tam nih aṭha lai maw ati. Aṭha ko lai. Kan ṭin ah pei an za alon deuh lai cu ka ti i kan ṭin. Cu hnu cun Kawl hla lawngte cu an vun sak i athiam zong an thiam ngai. Kan tlun inn in kan theih khawh ve.
Kan kirlei cu bus ngeitunih leidip lak kal ṭhan an duh ti lo i motor boat pathum an vun thlah. An biakam an lonh asinain motor boat in rili cung i kal zong cu kan duh pah ve. Kan i ciitmi boat pakhat belte voikhat cu avun i lei i kan lau ngai. Asinain Pathian nih afale cu ahumzual zungzal ko hna.
Watte khuate cu zeitik hmanhah ka phan ṭhan ti lai lo. Khua nuam phanh ṭhan duh awk khua zong asi lem lo. Asinain kumkhat tlin hlan ah Watte ka ngai ko cang! (Muko 2002 Sep)