Muko mekazin editor Pu Joel Ling hi mifel ngai sikaw cabia ṭial hi voiding ahcun ahlankan piin aka fial tawn. Muko hi thlathum voikhat chuahmi mekazin (Quarterly magazine) asi le chuah ṭhan azaat hlan thla hnih duh hna ah ṭial aka fial caan hi atlawm lo. Zarhhnih asilole thla khat duh ahcun ka ṭial khawh ko hnga. Asinain tutan cu March 2024 chuah ding caah February 25, 2024 tiangah zeihmanh achim lo. Ziahhme atu tiang cabia ṭial aka fial hnga lo. Ka rak ṭial ciami pakhatkhat hman ṭhan maw atimh hnga. Aṭial tawnmi ramrian leikap ṭial awk aṭha ṭung lo le tutan cu idin ko seh ati maw asi hnga. Tar asi cang le alung hna atlau cang le um ko rawh seh ati maw asi hnga ka ti. Khua tampi ka ruat.
Pu Joel Ling hi ka tupa asi lawng siloin Muko mekazin editor asi ca le kei Muko mekazin ah cabia aṭial lengmangmi ka si caah aka leng tawn. Muko mekazin dirhka hrawng ahcun ka cabia hi computer print-out (catlap) in lenpah in ahong laak. Ahnu deuh ah memory stick in ka computer chungta arak copy (tlen). Lenpah in rawl-ei ka thawtnak kan tuah tawn. Cucaah kan inn ah arat atam. Ka fale zong nih an tlaihchan ngai. Nupi aṭhit hnu zongah Lily Zing Ṭha nu hi mifim miṭhate asi le ka fanu Nancy hna nih atlaihchan tuk. Ahnu deuh ahcun cabia cu email lawngte in ka kuat. Hong laak ahau ti lo. Cupinah Kalemyo ah an chungte in kum thum an va um. Cutikah akan leng kho ti lo. Kan ikom kho ti lo le kan ngai tuk.
Cucaah Yangon an phanh ṭhan bak in zeitikdah nan chung tein nan kan len khawh lai tiah Nancy pasal Pu Than Sang Awi nih achonh hna. Zarhkhatnak ah ra hna seh ti kan duh nain azarh hnihnak Zarhpini February 25, 2024 lawngah an kan leng kho. Fanu lawngte pali an nei i upa bik Zing Ṭha le bang cu anungak cang. Hmundang ah hmu hna usilaw kan hngal ti hna lai lo. Athar in theihternak kan tuah.
Hi ni ahhin ka tupa Saya Tawk Lian nupi le fale an kan leng ve. Pa Tawk naupa Saya Ceu Kam US kal ding asi le an rak chawnta. Cun Saya Ceu Kam le Pu Ram Peng Thang, Phillip le an hawipa an um ve. Annih cu keimah caah Website an ka tuahpiakmi an liim deuh lomi an rak liim ta.
Hi ni hi Lily Zing Ṭha Nu Birthday arak si ngelcel. Akum cu ka hal lo. Ahngal lomi nihcun nungak ah an ruah ko lai. Nancy nih a u-nu chuahcam asi cu hngal kaw Birthday Present ah puan arak (order) cahpiak. Puanki te ah Lily tiah aṭialter hna. Vaampang ah Happy Birthday timi ca zong an taar. Cun Birthday Cake le pangpar tom hna apeek. Happy Birthday to You timi hla kan dirbu in kan sa. Ka tunu kumli asimi Helen Sung Iang nih candle chem cu duh tuk kaw amah nih achem. Hawidang zong ruah loin an itel tikah mi kan tamdeuh le Birthday zong cu asunglawi khun. Kan chung hnih in hman kan ithla. Cu hmanthlak (group photo) cu asunglawi tuk te lai. Tuanbia asi te lai.
Pumnak kan tuah hnga maw anti nain pumhnak aum ahcun ṭhutnak sersiam aum lai, pumh uktu biachim aum lai, phungchim aum lai, thlacam aum lai, biachim aum lai, hlasak aum lai i caan kan iza lai lo i um ko seh ka ti. Mibu kan um tikpoh Pathian biak zong hi ahau lemlo ka ti.
Inntual ah ṭhutdan le cabuai an hun i zapi cu rawl an ei. Kei le an pa bik Zingṭha Pa cu biaruah kan duh le cungdot ah kan kai le sakaung kan tuah le khua kong le ram kong kan tuak taan. Pu Ram Peng Thang le ahawile kan sinah hong ṭhu ve uh kan ti nain an biaruah kan hrawh hna lai anti maw zeidek duh lo. Cun ahnu deuh ah Pu Ram Peng Thang (Laicom) nih na Website cu kan tuah dih cang tiah ati. Cun kei le Joel cu Muko mekazin kong hna kan caih. Amin faak rumro in a-auh ti hlah uh. Mirang min aneimi cu Mirang min (First Name) in hawikom nihcun auh phung asi cuh.
Joel Ling nih Muko mekazin editor aṭuannak hi kum 25 renglo asi cang. Muko mekazin hi LBC ta ti asinain amah tein adirmi asi. Atu ka umnak inn cawk ka timh lio 2002 kum ah amah Joel le mithi Pu Siang Hu Thang letin inn cu kan zoh. Kan kirlei ah Kawi Siang nih Joel cu Muko editor na ṭuan hi lahkhah zeizat dah na hmuh tiah ahal. Thlakhat K10,000 ati. Kawi Siang nih cubang rian cu tuanrai va si hlah. Iphuak. Malaysia ah kan kalter lai arak ti.
Kei nih Muko editor ṭuan peng cu ka fial. Zeidang lei in ka bawm kho lo le na min athang lai. Mi nih an in upat lai ti rumro in ka forh. Apu Rev Dr Thawng Ling Mualhlun nih Muko editor ṭuan cu forh peng ve kaw computer hna acawkpiak. Inn hna ahlanpiak. LBC nih an hngal maw hngal lo dek. Atu ahcun Pu Joel Ling cu amin thang tuk cang kaw Laimi nih ahngal lomi cu an um ti lo. Amin than hi Muko editor aṭuan ca lawngah asilo. Cauk ṭhaṭha pathum pali aṭial ca zongah asi. Amah le Muko thawng in LBC zong amin athang ve ti khawh asi. Keimah zong amah cauk Ram King timi Mirangholh (The Lonely Land) ti in ka leh ruang le Muko mekazin ah cabia ka ṭial lengmang ruangah aka hngal lo ding nih aka hngalmi an um ve.
Caan khat lioah Muko editor lahkhah hi Senior Pastor lahkhah nakin tamdeuh seh ti arak si. Biatung dirhtu nih editor cu zapi ṭuan khawhmi asilo. Pastor cu ahopoh ṭuan khawhmi asi arak ti. LBC upa nih an rak duh lo. Hi lio kong hi athar in kan caih. Zeicahtiah hi ni ah LBC pastor pawl lahkhah kong Church Council meeting ah an caih ti kan theih. Senior nih K600,000, Associate nih K590,000, Assistant nih K580,000 hmu hna seh anti, anti. Muko editor lahkhah cu caih rih lo asi. Hi hrawnghrang asi vete ko lai. LBC nih Muko editor lahkhah an pee lo nain alahkhah zat cu an ithlak ve.
Kan biaruah lio ka chimmi pakhat cu Muko editor lahkhah hi LBC nih pe seh. Cun cabia ṭialtu pawl hi cabia ṭialman (honorarium) pee hna selaw aṭha hnga. Laica dirkamhnak le Laica ṭhanchoternak asi hnga ka ti. Caṭialman peek hi cu ka chim zungzalmi asi caah Chokhlei mekazin nih cu kong ṭial cu an rak ka fial le cabia zong ka ṭial bal. “Caṭialman Kan Ipeek Ahau” tiah July 2010 ah ka rak ṭial. Peek lo hi aphung hmanh asilo. Laimi nih miphundang kan tluk hna lonak zawn asi. Catialman ahmu bal lomi lawngte kan si tikah hmuh phung asi hmanh kan thei lo. Micheu nihcun man peek ahau lo. Ka cabia nan hman le kai lawm. Nan duh le lakphak kan dangh hna lai anti lehlam. Mirangholh le Kawlholh in cabia ṭial tikah phaisa hmuh ṭung i Laiholh in ṭial tikah hmuh lo cu Lai mino nih kan holh nautatnak ah an hman lai ti phan aum.
Cun mino Laica he computer he athiammi Laiholh mekazin editor ṭuan kho ding an harnak kong hna kan caih. Ṭhinṭhang mekazin zong nih kan hnulei kum 15 in atu tiang editor ṭuan kho ding (part time) mino kan hmuh lonak hna kan caih. Muko mekazin tu cu amah Joel nih fel tein pehtlai tein aṭuan caah LBC kan van aṭha tuk. Muko le Ṭhinṭhang mekazin nunter peng le ṭhatter chin lengmang hi Hakha holh ahmangmi vialte kan rian asi tiah ka ruah.
Cuti bia kan iruah hnu adongh lai ah tutan Muko mekazin ah zeidah na ṭial lai. Ṭial awk dang na theih lo ahcun atu ka nin len hnanak hi ṭial ko hme tiah Muko Editor Pu Joel Ling nih aka ti. Ka ṭial ko lai teh ka ti le hihi ka ṭialmi cu asi. 2/3/2024.