Atulio cu tangka anei tungmi nih tangka hman awk an neih lo lio. Mirum zong an si afah lio. Tangka nih zeipoh atuah khawh timi bia ahmaan lo lio asi. Aruang cu bank pawl nih an biakam an zul kho lo. Kan peek hna lai antimi services (vuan sawng hmuh) akan pee kho lo. Duh tik poh laak khawh ding in an sin kan ichiahmi kan tangka cia kan chuah kho lo. Zeicahtiah harnak an tong ve. Harnak an ton ah teh an pur viar lai maw? Kan neihchun phaisa kan ikhon ciomi teh kan sung lai maw? Hi biahalnak hi alaar liote asi.
Ka bia adonghlei ah aphi ka chim te lai. Ram pakhat sipuazi hi atlangpi in phun thum ah an then. Thilser (production), cawkzorh (trade) le mirian tuan (service) an si. Banks hi mirian ṭuantu an si. Mirian tuantu pawl (services industry) lakah alian cem an si kan ti khawh. Mirian an ṭuanpiakmi pawl hi atam chin lengmang. Asang chin lengmang fawn. Aniam deuhmi an rak ithawknak pawl kan chim lai.
Pu Thla To nih hman aherh rih lomi K100 anei. Atangka cu hlanlio bantukin thingkuang chung hna bizu chung hna ihphah tang hna ah achia lo. Bank ah achiah. Bank nih kumkhat ah akarh K8 an peek. Kha tangka K 100 kha Pu Sui Lian nih ai cawi le akarh K13 apeek. Cutikah bank nih a umhmun in K5 ai miak.
Bank miakter loin Pu Thla To nih Pu Sui Lian direct in rak coih selaw Pu Sui Lian caah atha deuh hnga lo maw? Pu Thla To zong asung fawn lai lo. Apoinak cu Pu Sui Lian nih Pu Thla To tangka cawi awk aneih ahngal lo. Hngal hmanh selaw Pu Thla To nih acoih duh lai maw? Azum lai maw? Zum hlah, coih hlah.
Hitihin akarlak ah bank nih ai miak. Mikip nih an tangka bank I an chiah cio tikah billions asawm le aza in bank aphan. Bank nih mi tangka in rian an tuan. Mi service (vuan sawng hmuh) an kan peek. An imiak tuk fawn. Hihi Banking (baan lohngan) achekhan cu asi ko.
Zapi nih bank i tangka kan chiah tikah Savings Account kan hman. Kumkhat ah zakhat ah cuzat karhseh ti asi. Duhtikpoh ah laak ṭhan khawh asi. Cun Fixed Account ti asi i thlaruk, kumkhat, kumhnih hlan ahcun ka chuah lai lo timi asi. Akarh cu Savings Account nakin atam deuh ve. Cun Current Account ti asi i akarh aum lo. Kampani pawl nih hmanmi asi. Tangka an khumh lelek, an chuah lelek. Cun Call Collect timi cu ani in akarh tlawmte hmuh asi. Ni 10 lawng na chiah zongah ni 10 ca na hmuh lai. Savings Account kha cu thla khat atlin lo ahcun akarh tuakpiak asilo.
Banking hi amiak tukmi business (sipuazi lohngan) asi caah mirum nih dirh an duh cio. Mah duh poh in dirh khawh asilo. Cozah sinah licence sawk ahau. Tangka hram tampi neih ahau. An tangka hram chung in % zeimawzat Central Bank (Baho Baan) ah chiah asi. Cun Central Bank nih cozah bank he private bank he supervise atuah hna.