Laimi nih hla kan sak cemmi cu Pathian hla asi. Zing pumh ah kan sak. Zanlei pumh ah kan sak. Nithum zan pumh ah kan sak. Pumhnak kip ah kan sak. Laimi cu Khrihfa kan si bantukin thih tik, nupi ṭhit tik, chuahni lawmh tik le camipuai awn lawmhnak le ramdang kal dingmi thlahnak cu pumhnak ṭheu in tuah asi. Cu tikah Pathian hla ṭheu cu sak asi.
Hiti Pathian hla hmunkip ah atu le atu kan sak tikah zapi sak in kan sak. Hlaremh le solo ti bantuk lawngah a sami lawng nih sak asi. Asinain zapi ngaih cu atong ṭhiamṭhiam.
Zuun hla teh zeitik ahdah zapi sak aton bal? Zeitik ahdah zapi ngaih aton bal? Cucaah kan zuun hla hi mino nih an thiam ti lo. An sa ti lo. Cucaah an uar pek lo. An mawh lo.
Mino nih cun Kawl hle deuh hi an thiam cang, an sak cang. Kawl hla cu TV in siseh, radio in siseh, concert (stage show) in siseh an ngaih lengmang i an thiam colh, an duh phah.
Kawlram hi zeidang ahcun a ṭhangcho lo nain zuun hla ahcun aṭhangcho ngai. Hla phuahtu nih an duh paoh an phuah ngam lo nain saknak hmun tampi an ngei. Stage show le eidin dawr le bus cungah tampi an sak. TV le radio pin ah kheset le CD le VCD karaoke chan aphan i cu nih cun abawmh hna. Hi ruangah kan Lai zuun hla zong cu avon dolh dihnak hi asi.
Kanmah Laimi zong nih zuun hla hi tha kan pe lo. Kan piangthar thlu rua. Kan fale hlasak thiammi zong zuun hla sak thlauh kan hmang. Zuun hla hi sual ah kan ruah. Biaknak nih kan nunphung kan hrawhter.
Kum khat cu LBC, Yangon Christmas pumh dihah zuun hla sak zuamnak kan rak tuah i zapi nih an duh ngai. Asinain kum 2002 Christmas ah cun zuun hla cu sak bak lo ding ti asi cang. LBC Nubu nih tangka kawlnak ah Grand Dinner (rawl danghnak) an tuah i mino nih Kawl zuun hla in an kan dangh chih. Yangon ah Sianghleirun sianghngakchia hruainak in Chin National Day an tuah i ahram thawk ah Lai (Chin) hla pakhat pahnih an sak i cu pin cu Kawl hla lawng te asi. Mirang hla tlawmpal cu ai tel ve Hakha zongah 2002 kum Lai miphun ni cu hlunghlai ngai in an tuah i Kawl hla lawng ngawt an sa ti kan theih. Kan Lai Miphun Ni hmanh ah Lai zuun hla kan sa ti loh. Lai Miphun Ni ah Lai hla lawng bak sak ding ti sisehlaw Lai zuun hla kan thiam lo caah Pathian hlasak ahau men hnga.
Lai zuun hla kan ti tikah Kawl hla kan huat caah asi lo. Mirang hla kan huat ca zongah asi lo. Mino nih cun Lai hla he Kawl hla he Mirang hla he thiam cio awk asi. Mirang hla thiam le bang cu Mirang holh thiamnak ah abawmtu asi. Zei holh paoh ah asi ko. Cucaah cun pei zunhla cu Lai holh thiamnak ah aṭhat tuk cu. Khuapi chung Laica thiam lomi mino caah aṭha khun.
Mino nih Lai zuun hla pin ah Lai nunphung dang zong an thlau thluahmah lai. Vawleicung thil kalning asi. Ai dawh tukmi kan hnisen le kan puan sen zong hi nungak nih an uar set ti lo. Nutung thuam deuh asi cang. Cucaah Lai zuun hla hi lo hlah seh ti kan duh ahcun hmun kan pek deuh ahau. Tha kan pek deuh aherh. Concert zong kan tuahpiak lengmang hna awk asi. Hlasak thiam le hla phuah thiam zong upatnak kan peek hna ahau. (Muko 2003 March)