Work Method
Journalist rian ahcun speed, accuracy, fairness ahau. Khulrangte, dikte, hmante le taya tein ṭuan ahau. Zeicatiah cu ni ah, cu suimilam ah dih seh, press ah kuat siseh timi deadline aum peng caah asi. Ahman lomi chuah sual lo izuam peng ahau. Cucaah double check tuah ahau. Guardian Daily ka ṭuan lio ah, check, recheck and countercheck an kan ti tawn. Capo pakhat an chim tawnmi cu, “American editors are good. They try not to make mistakes. Chinese editors are better. They leave the corrections to the readers” anti. Asullam cu American editors pawl cu an thiam ngai. Palh lo an izuam. Tuluk editors pawl hi an thiam chinchin. Careltu nih kan palhnak hmu te hna seh anti, ti asi.
Interview
Journalist si mitampi nih an duhnak cu mikip interview an tuah khawh hna caah asi. Zapi nih ton khawh lomi presidents, prime ministers, filmstars, singers, sportsmen and women tehna hi interview va tuah i va ton khawh, hawikom zongah vai ser khawh asi. Asinain, interview tuah aduh lomi an tam, anmah ca a ṭha ding asi lo ahcun. Cucaah interview atuahtu ding pa/nu hi hawikomh le biadawh chimthiam aherh ngai. Interview tuah na duhmi pa/nu kong hi theih hmasa ahau. Na hal duhmi kong zong atawkfang na theih hmasa ahau.
Cartoons
Cartoons ti cu Kawl zong nih an ilaak i nan theih ciomi asi. Cartoon nihhin minung asilole thil pakhat zong ruahnak pakhat zong kha pungsuai i vun langhtermi, nihchuak vun saihmi khi asi. Caricature tuah ti asi. Lampoon ti tehna satire ti tehna an hmanmi holh an si. Bawi pakhat kha cartoon nih avun suai ahcun amah he aa lo ngai ṭung muichia ngai ṭung khin avun suai i zoh le rel nuamngai i tadinca pakhat ah tel lo awk aṭha lomi, mi nih an duh ngaimi pakhat asi.
Editorial, Op Ed
Editorial timi cu editor ruahnak ti asi. Tadinca kip ah editorial cu aum i cafang ngan deuh in ṭial asi tawn. Editorial ai ṭialnak cahmai pawng ahhin Op Ed anti i Opposite Editorial timi aum. Ruahnak dang cabia maw, editor sin cakuat maw ṭialnak asi.
Editor, Publisher, Printer
Tadinca pakhat ah editor pa hi ca chuah awk le ca leikap ah a ṭuantu asi i publisher hi aneitu asi. Kawlholh cun taṭhe asi. Aneitu asi nain zei chuah ding ti hi cu ai thlak lem lo. Ai zum deuhmi editor nihcun editorial policy ah nai thlak ahcun na editor ka ṭuan lai lo tiah publisher pa kha ati ko lai. Printer timi hi press aneitu, ca namtu asi. Anmah tadinsataik zong nih tuah khawh neih khawh asi. Adang fial khawh asi. Tadinca pakhat ahcun hi pathum hi aho dah an si ti hi abiapi ngai. Abiapimi dang pakhat cu circulation zeizat dah ti asi. Mitam nih an laa maw laa lo tinak asi. Kawlholh cun sawngye anti.
Editorial Policy
Tadinca na chuah zongah mekazin na chuah zongah editorial policy na nneih ahau. Cucu atawinak in chim ahcun zeidah kan chuah lai, zeidah kan chuah lai lo timi policy ngeih asi ko. Democracy ram i tadinca an biapit khunnak le rel an nuamh cemnak ahcun party pahnih pathum nih bawi ṭuan kha kumli voikhat kumnga voikhat ti bantukin i cuh asi. Cutikah zei party hmanh kan ṭanh lai lo, ṭawmnak nei lo tein ca kan ṭial lai ti bantuk te hna asi hnga. Asilole ṭanhawk i kan ruahmi cu kan ṭanh bak lai. Sawi awk i kan hmuhmi cu kan sawi ve ko lai tibantuk policy asi hnga.
Yellow Journalism
Mi cheukhat cu kan tadinca, kan mekazin mi nih duh hna seh, man deuh seh tiin milung athawhter khotu, thinphannak, ṭihawk, bia vaivuan le bia thurhnawm zong an ṭial tung. Cucu yellow journalism anti i hrial cio izuam u tihi mipi le upa nih anti tawn.
Editorial Style
Editorial style timi hi Mirangholh ahcun punctuation hman ning cem asi ti khawh asi. Mr, Dr, Rev, tiin fullstop loin maw kan ṭial lai asiloah Mr., Dr., Rev. tiin period kan deh lai dah ti tehna asi ko. Tadinca min hna hi The New Light of Myanmar tiin maw kan ṭial lai The New Light of Myanmar tiin atlu nawnte in dah kan ṭial lai ti bantuk deuh hi asi. Laica ahcun asi tiin maw one word in kan ṭial lai asi tiin dah two words in kan ṭial lai. Na-in tiin maw hyphen he kan ṭial lai nain tiin dah hyphen loin kan ṭial lai ti tehna khi editorial style cu asi ko.
Advertisement
Kawlholh in cawngia kan timi khi asi. Ad tiin atawinak in an hman òheu. Advertisement hi tadinca le mekazin le TV tehna an tangka hmuhnak bik, an nunnak asi. TV cawngia hi cu commercials anti. Classified ad anti ahcun aphun an ṭhen i an cawngiami khi asi. Rian auhnak, mithi thawngthanhnak, ṭhitumh thawngthanhnak tehna khi classified ad kan ti. Ramdang ahcun nupi ka herh, vangeih ka duh, cu bantuk asi lai, thawng rak ka thanh, aho hmanh ka chim hna lai lo, kan itong lai i ai duh khomi kan si maw si lo kan icaih lai timi cawngia a tam ngai. Kawlram ahcun an ngamh rih lo. Aho nih dek athawk te lai.
Circulation
Circulation timi cu zeizat dah an ser ti asi ko. Kawlholh in sawng-ye anti. Atu Kawl tadinca pahnih hna hi circulation tinghnih dengmang veve an si. The New Light of Myanmar hi sawng-ye 25,000 hrawng asi. Tadinca le mekazin cu circulation atam tik paoh ah cawngia tam deuh ahmuh khawh ve. Aṭuantu journalists an thiam ahcun circulation atam i acawngia zong atam ve i an tadinca amiak.
Editor Thongthlak Atam
Tadinca pakhat nih vuanci maw acozah maw sawinak aṭial tikah editor kha tlaih khih le thongthlak aum ṭheu. Cu tucu freedom of the Press aum lonak ram deuh ah asi. Cun reporters cheukhat cu raltuknak hna ah an kal i raltuk lio hmanthlak an izuamnak ah kahchih le thahchih an tong lengmang. Hawi phanh lonak an phan i hawi theih lomi an theih, hawi hmanthlak lomi an thlak khawh ahcun scoop an ngah ti asi i bonus tampi an hmuh tawn ve.
Journalist le Celebrities
Jornalist nih minthangmi, mi uarmi (celebrities) an ton khawh tawn hna i anmah lila zong hi celebrities ah an icang kho ve. Cu tadinca i reporter pa, cu TV i newscaster nu tiin an min athang tuk kho ve. Abikin TV i a ṭuanmi hi an mui alangh lengmang caah an min athang tuk. An ichawhnak paoh ah mi nih an buut hna i, anmah um tein an um kho lo. Privacy an nei kho lo. (Muko 2001 December)